DILI, 15 novembru 2022 (TATOLI)-–Fundu Populasaun hosi Nasaun Unida (UNFPA, sigla inglés) iha Timor-Leste deklara katak populasaun iha mundu atinje biliaun ualu.
“Iha loron populasaun ho biliaun ualu ohin ne’e, fó hanoin hikas katak ita moris iha mundu ida ho oportunidade rohan laek ba ita hotu, maski iha mós dezafiu oioin ne’ebé mundu hasoru hela,” Reprezentante UNFPA iha Timor-Leste, Pressia Arifin-Cabo, hateten, iha ámbitu lansamentu relatóriu prelemináriu sensu uma-kain no populasaun tinan 2022, iha auditóriu Ministériu Finansa (MF), Aitarak-laran, tersa ne’e.
Reprezenta ne’e dehan, ida-ne’e hanesan marka ida ba umanidade no oportunidade boot ida atu harii reziliénsia demográfiku ba dezenvolvimentu sustentável ba Timor-Leste, ho fó sai rezultadu prelimináriu sensu ne’ebé indika populasaun iha Timor-Leste ho totál millaun 1,3, oferese mós oportunidade ida atu investe dadus hodi haree ba orsamentu jerál, formulasaun polítika no planeamentu jerál ba dezenvolvimentu ba tinan 10 tuir mai to’o bainhira sensu tuir mai hala’o fali.
Notísia relevante: Relatóriu prelemináriu sensu uma-kain rejista populasaun millaun 1,3
UNFPA iha mundu no Timor-Leste iha istória ne’ebé naruk hodi fó apoiu ba sensu sira, ne’ebé mak sai hanesan fonte dadus populasaun ne’ebé esensiál tebes ba planu dezenvolvimentu.
Iha biban hanesan, Ministru Finansa, Rui Augusto Gomes, hateten, iha dékada ida liubá, mundu selebra loron biliaun hitu, ne’ebé kresimentu populasaun barak liu mai hosi Ázia inklui Timor-Leste, maski nia kontribuisaun ladún signifikante.
“Tanba populasaun mundiál kontinua aumenta iha espetativa vida, mellór saúde no nutrisaun, ijiene pesoál no medikamentu. Ita tenki husu pergunta hanesan ajénsia UNFPA husu, oinsá mak ita bele kria mundu ida ne’ebé ita biliaun ualu tomak bele moris di’ak no mais espesífikamente? Oinsá mak ita bele kria Timor-Leste ida ne’ebé ita milliaun 1,3 bele moris di’ak maski hasoru dezafiu oinoin hanesan pobreza, dezempregu, mudansa klimátika, deklina iha rekursu finanseira no inserteza kauza hosi tensaun jeopolítika?,” nia subliña.
Jornalista : Antónia Gusmão
Editora : Julia Chatarina
