Autoridade Covalima husu ba MEJD atu konstrui eskola sekundária paralelu
COVALIMA, 16 novembru 2022 (TATOLI)—Autoridade munisipiu Covalima liuhosi Administrasaun Munisípiu Covalima (AMC) hato’o ona proposta husu ba Ministériu Edukasaun Juventude no Desportu (MEJD) atu konstrui eskola sekundária parelelu iha munisípiu Covalima.
“Atu hateten lolos AMC hato’o proposta ba Ministru Edukasaun Juventude no Desportu katak iha tinan 2023, ita mós hakarak konstrui tan eskola Sekundária Públiku paralelu ida, ho razaun estudante ne’ebé eskola iha eskola sekundária Jeral Públika de Suai ho totál estudante ne’ebé boot,” Administradór munisiípiu Covalima, Francisco de Andrade, hato’o ba Agência tatoli, iha nia kna’ar fatin, Sukaer Laran, kuarta ne’e.
Atu konstrui tan eskola sekundáriu paralelu ne’e tanba haree ba realidade númeru estudante iha eskola sekundáriu jerál públiku Suai barak liu entaun sala-de-aula la sufisiénte atu akumula no prosesu aprendizajen iha sala-de-aula estudante liu na’in-35, ho nune’e prosesu aprendizajen la’o ladún di’ak.
Eskola Sekundáriu Jerál paralelu ne’e ekipa identifika ona fatin iha eskola Bázika Central (EBC) Sanfuk, suku Camanasa, postu administrativu Suai no sei loke mós iha postu administrativu Tilomar
“Ita mós halo proposta ida-tan atu loke eskola sekundáriu paralelu ida iha Tilomar, tamba ho razaun ida komunidade mai hosi Fatumea nia família barak hela iha Salele, sira eskola iha eskola sekundáriu jerál Suai ne’e, loron ida sira gasta osan ba transporte $1.00 to’o $2.00. Entaun, ita hanoin ona sira-nia inan-aman agrikultór defísil atu hetan osan,” nia dehan.
Ho razaun hirak ne’e mak autoridade Covalima iha ona planu atu loke tan eskola sekundáriu paralelu iha postu administrativu Tilomar, nune’e oinsa atu hakbesik edukasaun ba povu agrikultór nia oan sira bele asesu edukasaun.
Maske loke tan eskola sekundária Jerál paralelu, maibé ne’e sei la fó impaktu ba eskola téknika vokasionál sira, tamba ema-ne’ebé tama eskola ne’e tuir nia hili laiha obrigasaun atu tama iha tékniku vokasionál ka sekundária jerál, tamba ne’e ema nia direitu atu hili eskola.
Haree kona-ba rekursu eskola sai ona parelelu entaun rekursu iha sentrál sei sai hanesan koordenadór ba eskola hanesan iha EBC tuir lei órganika edukasaun katak kada profesór hanorin oras 24 nia laran se la to’o oras refere no sei koloka sira hanorin iha eskola paralelu.
Hafoin haruka proposta atu loke eskola paralelu ne’e, bazea ba despaixu hosi Ministru Edukasuan Juventude no Desportu atu loke eskola paralelu iha Suai, ministru forma ona komisaun ida, nune’e oinsá inskrisaun hahú loke ona iha Suai loke ona iha Tilomar mak seidauk iha despaixu.
Jornalista : Celestina Teles
Editór : Cancio Ximenes
