CVTL-SASCAS halo doasaun raan hodi ajuda pasiente iha HNGV
DILI,16 novembru 2022 (TATOLI)— Cruz Vermelha Timor-Leste (CVTL) hamutuk ho Servisu Apoia Sosiedade Sivil no Auditoriu Sosiál (SASCAS), kuarta ne’e, hala’o doasaun raan hodi ajuda pasiente no labarik sira ne’ebé presiza raan iha Hospitál Nasionál Guido Valadares (HNGV).
“Atu selebra loron aniversáriu SASCAS nian, nune’e ami hamutuk koordanasaun ba malu hodi halo doasaun raan atu bele ajuda ba pasiente sira ne’ebé presiza raan bainhira halo operasau”, hateten Sekretáriu Jerál Cruz-Vermelha Timor Leste (CVTL), Luis Pedro Pinto ba jornalista sira iha eskritóriu nasionál CVTL, Formoza-Dili.
Atividade doasaun raan ne’e importante tebes atu ajuda ba pasiente sira ne’ebé presiza raan bainhira hala’o operasaun no ajuda mós ba labarik sira ne’ebé sofre dengue.
Nune’e, nia agradese ba parseiru no ba entidade hotu inkklui SASCAS ne’ebé mak voluntária partisipa atividade doasaun raan ne’e.
“Ami enkoraja ba ema hotu tenke apoia sira nia raan tanba raan turuk ida salva ema seluk nia moris”, nia enkoraja.
Iha fatin hanesan, Diretór Ezekutivu Servisu Apoiu Sosiedade Sivil no Auditóriu Sosiál (SASCAS), Edvin Duarte Soares Noronha informa SASCAS halo doasaun raan ba banku de sangue hodi bele ajuda pasiente sira ne’ebé presiza raan.
“Ami halo doasaun raan ida ne’e ba banku de sangue tanba ami atu komemora ami nia loron aniversáriu ba-dala ida entaun ho apoiu doasaun ne’e hodi ajuda ema sira ne’ebé mak presiza ita nia tulun”, afirma Edvin Duarte Soares Noronha.
Partisipante ba atividade doasaun raan hamutuk 38, maibé depende ba analiza ho check up ne’ebé mak ekipa saúde sira halo katak prienxe rekezitu.
Jornalista : Felicidade Ximenes
Editór : Florencio Miranda Ximenes
