iklan

NASIONÁL, HEADLINE, KAPITÁL

Governu konvida Governadór NTT partisipa loron proklamasaun independénsia da-47

Governu konvida Governadór NTT partisipa loron proklamasaun independénsia da-47

Ministru Administrasaun Estatál, Miguel Pereira de Carvalho. Imajen Tatoli/António Daciparu

DILI, 16 novembru 2022 (TATOLI)–Ministru Administrasaun Estatál, Miguel Pereira de Carvalho, informa, Governu simu konfirmasaun hosi Prezidente Repúblika (PR), José Ramos Horta, atu konvida Governadór Nusa Tenggara Timur (NTT), Viktor Laiskodat, hodi partisipa iha loron proklamasaun independénsia ba da-47 iha loron 28 novembru.

“Ministériu hetan konfirmasaun hosi Prezidente Repúblika katak konvida mós Governadór NTT hodi mai partisipa maibé to’o agora ami seidauk hetan konfirmasaun ofisiál, maibé Prezidente Repúblika pretende para atu konvida,” Ministru informa iha Parlamentu Nasionál, kuarta ne’e.

Nia dehan, konfirmasaun bainaka espesiál ida-ne’e de’it mak MAE simu hosi Xefe Estadu, baibain Ministériu Negósiu Estranjeiru no Kooperasaun (MNEK) mak organiza maibé to’o agora MAE seidauk hetan konfirmasaun kona-ba konvidadu seluk.

Notísia relevante: Preparasaun loron proklamasaun independénsia iha Manatuto atinje 60%

Serimónia komemorasaun loron proklamasaun independénsia ne’e hala’o iha munisípiu Manatuto, ne’ebé daudaun komisaun organizadora sira halo ona preparasaun no progresu atinje ona 75% tanba kampu atu realiza serimónia isar bandeira kuaze konklui.

“Daudaun iha terrenu realiza ona instalasaun fatin ba feira no konsertu muzikál, entaun preparasaun sira la’o ho di’ak tebes,” nia tenik.

Atividade oioin mak sei realiza iha ámbitu komemorasaun loron istóriku ne’e, hahú hoi misa agradesimentu iha loron 26 novembru, kontinua tau-aifunan iha Jardin Eroi iha loron 28 novembru, no dadeer isar bandeira.

Enkuantu, hahú hosi loron 22 to’o 28 novembru sei realiza feira iha Manatuto no iha loron 28 novembru kalan iha konsertu muzikál iha fatin serimónia.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!