Komunidade Fatulia rihun tolu-resin sei simu cesta bázika
BAUCAU, 16 novembru 2022 (TATOLI) – Komunidade hosi suku Fatulia, postu administrativu Venilale, munisípiu Baucau hamutuk rihun tolu-resin sei simu cesta bázika iha fulan-novembru ne’e.
Xefe suku Fatulia, Angelino Moisés Perreira, esplika, númeru refere bazea ba dadus benefisiáriu ho programa hanesan iha tinan-2021 ne’ebé mai hosi aldeia haat iha suku Fatulia.
“Ho apoia cesta bázika bele ajuda ona komunidade atu sustenta moris iha uma-laran,” Xefe suku Fatulia informa ba Agência TATOLI iha Vila Nova, kuarta ne’e.
Hosi totál dadus refere posibilidade benefisiáriu aumenta tanba tinan-2022 família balun aumenta membru família no parte autoridade hato’o ba kompañia atu fó atensaun bainhira prosesu implementasaun hahú.
Autoridade suku rasik hetan informasaun hosi kompañia iha semana oin sei hahú fahé cesta bazika ba komunidade Fatulia.
Angelino Perreira husu ba komunidade Fatuliane’ebé daudaun ne’e iha paradeiru sai hosi Fatulia atu akompaña informasaun nune’e bainhira simu cesta bázika bele too iha sede suku.
Suku Fatulia kompostu aldeia haat hanesan aldeia Bahadato, Osso-uaque, Uai-to-bono no Uatulia-ana, ho totál populasaun hamutuk rihun tolu-resin hosi xefe família 688.
Jornalista : Natalino Belo
Editór : Evaristo Soares Martins
