OJE 2023 ba ANPM millaun $8,5 aprovadu

DILI, 16 novembru 2023 (TATOLI)—Parlamentu Nasionál (PN) aprova proposta-lei Orsamentu Jerál Estadu (OJE) 2023 ba Autoridade Nasionál Petróliu no Minerál (ANPM) ho montante $8,500,000 iha faze espesialidade.
“Rezultadu votasaun a-favór 45, kontra lima (5) no abstensaun 16. Nune’e, Orsamentu Jerál Estadu (OJE) 2023 ba Autoridade Nasionál Petróliu no Minerál (ANPM) ne’e pasa,” Prezidente PN, Aniceto Longuinhos Guterres Lopes, hateten iha debate proposta OJE 2023 faze espesialidade iha PN, kuarta ne’e.
Montante orsamentu ne’e sei implementa programa jestaun rekursu petrolíferu no minerál $5,998,263 ho sub-programa funsaun reguladór iha área petróliu no minerál ho atividade tolu (3), sub-programa promosaun no avaliasaun petróliu no minerál ho atividade ida (1).
Programa boa-governasaun no jestaun instituisionál $2,501,737 ho sub-programa rua (2) no atividade haat (4).
Orsamentu CAC pasa
Aleinde ne’e, PN aprova proposta OJE 2023 ba Komisaun Antí Korrupsaun (CAC, sigla portugés) ho montante $2,158,942 iha espesialidade ho votu a-favór 56 , kontra 0 no abstensaun haat.
Programa asesu justisa prevee $206,036 ho sub-programa investigasaun kriminál ho atividade rua, sub-programa informasaun no seguransa ho atividade rua (2).
Programa boa-governasaun no jestaun instituisionál $1,952,906 ho sub-programa sia (9) no atividade 16.
Orsamentu $3,010,442 ba KFP aprovadu
Entretantu, deputadu sira iha Parlamentu Nasionál (PN) aprova proposta OJE 2023 ba Komisaun Funsaun Públika (KFP) ho montante $3,010,442 iha espesialidade ho votu a-favór 47, kontra rua (2) no abstensaun 12.
Orsamentu ne’e sei implementa programa boa-governasaun no jestaun instituisionál $519,234 ho sub-programa hitu (7) no atividade 20.
Programa igualidade jéneru no inkluzaun sosiál $5,400 ho sub-programa ida 91) no atividade rua (2).
Enkuantu iha debate ne’e instituisaun tolu ne’e laiha proposta, nune’e deputadu sira avansa de’it ba votasaun.
Jornalista : Nelson de Sousa
Editór : Cancio XImenes

