iklan

DILI, POLÍTIKA

PN aprova Fundu Espesiál Dezenvolvimentu Ataúro

PN aprova Fundu Espesiál Dezenvolvimentu Ataúro

Mapa Ataúro. Imajen/Espesiál

DILI, 16 novembru 2022 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2023 ho montante $13,400,000 ba iha Fundu Espesiál Dezenvolvimentu Ataúro (FEDA) iha espesialidade ho votu a-favór 49, kontra ida (1) no abstensaun 11.

“Nune’e orsamentu ba Fundu Espesiál Dezenvolvimentu Ataúro (FEDA) ho alterasaun ne’ebé introdús exersisíu internu ida aprovadu,” Prezidente PN, Aniceto Longuinhos Guterres Lopes, hateten iha debate proposta OJE 2023 faze espesialidade iha PN, kuarta ne’e.

Enkuantu tuir livru orsamentál Fundu Espesiál Dezenvolvimentu Ataúro (FEDA) prevee iha montante inisiál $13,400,000 hodi bele implementa programa estrada no ponte $3,648,000 ho sub-programa infraestrutura no estrada, ponte no kontrolu cheias ho atividade rua.

Programa bolsu estudu $300,000 ho sub-programa dezenvolvimentu kapasidade rekursu umanu ho atividade ida.

Programa transporte $2,000,000 ho sub-programa operasaun ró ho pasajeiru no karga ho atividade ida.

Programa boa-governasaun no jestaun instituisionál $4,136,000 ho sub-programa tolu no atividade neen.

Programa bee no saneamentu $186,000 ho sub-programa ida ho atividade ida.

Programa eletrisidade $679,000 ho sub-programa ida no atividade rua.

Programa portu $515,000 ho sub-programa ida no atividade ida.

Programa igualidade jeneru no inkluzaun sosiál $336,000 ho sub-programa ida no atividade rua.

Programa turizmu $1,500,000 ho sub-programa ida no atividade ida.

Programa teknolójia informasaun no komunikasaun $100,000 ho sub-programa ida no atividade ida.

Maibé iha debate ne’e, deputada Maria Angélica Rangel (Fretilin)  ho Maria Angelina Sarmento (PLP) hato’o proposta ida ho  justifikasaun alterasaun programasaun FEDA tuir desizaun konsellu administrasaun FEDA identifika nesesidade planu asaun hanesan iha organizasaun no programasaun forma, konsege ordenamentu territoriál no fasilita serbisu monitorizasaun implementasaun asaun polítika.

Ho motivu ne’e, altera programasaun FEDA 10 ba programa tolu (3) de’it hanesan infraestrutura no konetividade, boa-governasaun no jestaun instituisional, igualidade jeneru no inkluzaun sosiál, la altera valór totál.

“Proposta ne’e hosi ami-nia diskusaun no mós ami simu karta ida mai komisaun C iha PN (trata asuntu Finansa Públika). motivu alterasaun ba programa 10 atu simplifika tuir dekretu-lei primeira alterasaun 24/2022, 19 maiu, atu simplifika tuir lei enkuadramentu haruka mak sai de’it programa tolu,” Deputada proponente, Maria Angelica fundamenta.

Planu anuál FEDA tenke hanesan mós ho planu territorial, tanba ne’e PN mak iha kompeténsia atu altera programa tuir dekretu-lei ne’ebé Konsellu Ministru (KM) aprova tiha ona.

Ministru Administrasaun Estatál (MAE), Miguel Perreira de Carvalho, hateten aseita proposta alterasaun ne’e tanba objetivu proposta Governu duni husu bele propoin hodi altera.

Tanba daudaun FEDA nia programa ida mak finansia programa ordenamentu territóriu Ataúro nian prevee mós sede infraestrutura tenke halo no sira seluk reabilitasaun asesu, planeamentu estrada, projetu bee-moos ho sira seluk. Entaun, konsellu administrasaun hanoin di’akliu projeitu sira-ne’e hatur iha programa infraestrutura no konetividade no sira seluk nia natureza hanesan.

“Purtantu sekretáriu konsellu administrasaun Ataúro ho Governu kontente tebes bainhira deputadu sira aprova proposta sira-ne’e. Bainhira aprova sei fasilita sekretária administrasaun responsavel orsamentál sira atu halo jestaun iha tempu ezekusaun,” nia hateten.

Enkuantu iha votasaun proposta ne’e ho votu a-favór 44, kontra tolu no abstensaun 13, nune’e pasa,

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!