LIQUICA, 16 novembru 2022 (TATOLI)– Prezidente Repúblika, José Ramos Horta observa ambiente polítika iha Timor-Leste hahú la’o di’ak, nune’e garante eleisaun lejislativa 2023 sei la’o iha páz no estabilidade nia-laran.
“Ha’u pesoalmente relasaun metin ho líder hotu. Ami reuniaun ona ho líder nasionál hotu hahú hosi maun bo’ot Xanana, Marí Alkatiri, Jenerál Taur Matan Ruak, Jenerál Lere Anan Timur, Francisco Guterres Lú Olo, so José Naimori mak seidauk hasoru malu, maibé buat hotu sei la’o di’ak”, dehan Xefe Estadu iha Tibar, kuarta ne’e.
Ho reuniaun hirak ne’e, Xefe Estadu observa ambiente polítika no situasaun rai laran hahú hosi maiu to’o ohin loron di’ak tebes entre Parlamentu Nasionál, Governu no Prezidente Repúblika.
“Ha’u nia responsabilidade mak viabiliza Governu nia servisu. Prezidente labele sai opozisaun ba Governu no Parlamentu Nasionál hodi halo konfrontasaun ka destrui situasaun ne’e labele, maibé tenke servisu hamutuk”, PR Horta afirma.
Tuir nian hanesan Xefe Estadu no Komandante Supremu Forsa Armada Timor-Leste hakarak haree situasaun kampaña eleitorál mai ne’e tenke 100% sivilizadu labele iha ataka malu, insulta malu, entre partidu politika, membru kandidatu partidu no seluk tan.
“Partidu sira tenke hato’o programa, ha’u hare partidu ida mak la aprezenta programa, nu’udar Prezidente Repúblika ha’u sei interven atu imi (Partidu Polítiku) nia programa iha ne’ebé ha’u hakarak haree, partidu ne’ebé ko’alia mangame ha’u hamutuk ho Komisaun Nasionál Eleisaun (CNE-sigla Portugés) sei halo intervensaun, nune’e eleisaun lejislativa ne’e ha’u sei akompaña 100%”, katak.
Jornalista: Hortencio Sanchez
Editór : Florencio Miranda Ximenes
