Autoridade Covalima diskute reativa komisaun jestaun risku dezastre naturál-PDIM 2024
COVALIMA, 17 novembru 2022 (TATOLI)–Autoridade munisípu covalima liuhosi enkontru koordenasaun munisipal diskute atu reativa hikas komisaun jestaun risku dezastre naturál no deskute halo elaborasaun Programa Dezenvolvimentu Integradu Munisípal (PDIM) 2024 iha Covalima.
Diretór Programa Dezenvolvimentu Integradu Munisípal (PDIM), Afonso Nogueira Nahak, hateten autoridade Covalima hala’o enkontru koordenasaun munisípal ne’e, realiza kada fulan bazea ba dekretu-lei númeru 3/2016 halo altesaun ba dekretu-lei númeru 54/2020 obriga kada fulan hala’o enkontru koordenasaun munisípal.
“Ha’u hakarak hato’o ba ita-boot sira ohin,ita diskute asuntu sira hanesan protesaun sivil no projesaun jestaun risku dezastre naturál ne’ebé aprezenta hosi dirasaun servisu munisipál protesaun sivil jestaun risku dezastre naturál no autoridade protesaun sivil no halo elaborasaun Programa Dezenvolvimentu Integradu Munisípal (PDIM) 2024,” Afonso Nogueira Nahak hateten ba jornalista sira, iha salaun AMC, Sukaer Laran, kinta ne’e.
Iha enkontru ne’e, membru konsellu koordenasaun sira diskute asuntu sira hanesan atu reativa hikas komisaun jestaun risku dezastre naturál ho razaun hodi halo identifikasaun no monitorizasaun distribuisaun materiál konstrusaun ba vítima sira.
“Razaun atu reativa fali komisaun jestaun risku dezastre hodi halo identifikasaun problema sira ne’ebé ita iha no hodi halo monitorizasaun distribuisaun materiál konstrusaun ba vítima dezastre sira durante ne’e, tanba vítima balun simu material konstrusaun la konstrui hikas uma, balun ba faan fali no balun lakon,” nia hateten.
Ho nune’e, autoridade Covalima liuhosi enkontru koordenasaun atu reativa hikas komisaun jestaun risku deazstre naturál iha tempu badak.
Aliende deskuti atu reativa komisaun jestaun risku dezastre sira mós deskuti planiamentu ne’ebé hakarak halo iha tinan 2022-2023 ne’ebé nia ezekusaun iha tinan 2024
Elaborasaun Planu Integradu Munisipal (PIM) 2024 ne’ebé sei hato’o hosi dirasaun servisu munisipál Programa Dezenvolvimentu Integradu Munisípal (PDIM) sei haree prosesu no lala’ok PDIM.
“Tanba ne’e iha enkontru koordenasaun munisipal ida-ne’e ita mós submete kona-ba elaborasaun PDIM 2024, iha Covalima tuir kalendáriu tau hamutuk ho despaixu hosi Ministru Administrasaun Estatal (MAE), ita hadi’a hodi tuir kalendáriu munisipal nian ne’ebé aprova hosi administradór munisípiu Covalima,” nia hateten.
Jornalista : Celestina Teles
Editór : Cancio Ximenes
