BOBONARO, 17 novembru 2022 (TATOLI) – Governu liuhosi Ministériu Obra Públiku, presiza orienta Institutu Jestaun no Ekipamentu, Institutu Públiku (IGE.I.P, sigla portugés), halo intervensaun urjénsia ba kondisaun estrada iha área Galisapulu, suku Lahomea, postu administrativu Maliana, munisípiu Bobonaro, tanba ameasadu kotu bainhira akontese udan-boot.
Komunidade hosi postu administrativu Bobonaro, Augosto Perreira, hateten bainhira akontese udan boot loron ida ka rua tán bele rezulta estrada iha área Galisapulu ne’e nakfera no no rai-halai (erozaun).
Notísia relevante: Komunidade preokupa estrada Galusapulu Lahomea ameasa atu kotu
“Ita agora daudaun bele haree kondisaun estrada ne’e grave duni ona, ida-ne’e bele fó ameasa ba komunidade nia vida, liuliu kondutór sira tula rai-henek todan ne’e. Sé ida-ne’e mak udan-boot mai tán, ne’e rai sira-ne’e bee lori hotu ba kraik, tanba ita haree estrada ne’e la metin,” nia informa ba Tatoli, iha Galisapulu, kinta ne’e.
Administradór postu administrativu Bobonaro, Juvinál Leto-Mau dos Santos, preokupa ho kondisaun estrada ne’e tanba bele fó impaktu ba movimetasaun transporte públiku no privada sira.
“Dalan alternativu seluk laiha, ita hosi kapitál munisípiu atu mai iha Bobonaro, atu mai iha Lolotoe ba to’o Suai ladi’ak hotu ona, tanba estrada ne’e ameasa atu kotu, ha’u ba mai haree, rai sira hodi leten monu mai taka tomak valeta ne’ebé mak sei iha hela prosesu konstrusaun, agora la di’ak ona, bronjong sira moos aat hotu ona,” nia haktuir.
Nia husu Ministériu Obra Públika atu orienta Institutu Jestaun Ekipamentu, Institutu Públiku (IGE.I.P, sigla portugés) halo intervensaun ho urjénsia.
“Se bele rai sira ne’e ateru halo rata fali, atubele fasilita ita-nia komunidade sira lori produtu lokál asesu ba merkadu, tanba kada loron-sábadu negosiante sira ba fa’an iha merkadu Maliana,” nia hateten.
Nia husu MOP bainhira atu legaliza projetu ba empreza ruma kaer obra iha fatin ne’e presiza halo uluk estudu kle’an nune’e bele dura durante tempu naruk, tanba estrada ne’e kada tinan akontese udan boot sempre hetan estragu.
Nia observa katak, instalasaun gabiaun no konstrusaun dreinazen iha área ne’e la’ós dehan laiha kualidade, maibé antes implementa projetu parte kompetente la halo estudu kona-bá ameasa sira hosi natureza.
Tuir observasaun Agência Tatoli iha terrenu nota katak, transporte públiku no privada kontinua halo movimentasaun liu iha dalan refere, maibé sei hein malu, ida ultrapasa tiha mak seluk bele hakat tuiri, tanba estrada parte kraik fera no nakfera tún ba okos ona.
Notísia relevante: OJE 2023 ba MPO millaun $8-resin aprovadu
Jornalista : Sérgio da Cruz
Editór : Evaristo Soares Martins
