iklan

EDUKASAUN, COVALIMA, POLÍTIKA

Veteranu Covalima rekomenda loke eskola sekundária paralelu tenke iha rai própriu

Veteranu Covalima rekomenda loke eskola sekundária paralelu tenke iha rai própriu

Veteranu iha Covalima, Martino Amaral Cova. Imajen Tatoli/Celestina Teles.

COVALIMA, 17 novembru 2022 (TATOLI)–Veteranu Covalima, Martinho Amaral Cova rekomenda ba Governu bainhira atu loke tan eskola sekundária paralelu tenke prenxe pontu sira hanesan iha rai própriu, númeru estudante no apoia hosi estudante sira-nia inan-aman.

“Governu hakarak loke eskola sekundáriu jerál paralelu, maibé ha’u-nia rekomendasaun tenke  iha rai própriu, labele hamutuk ho eskola sira seluk nune’e kualidade ensinu aprendizajen la’o tuir progresu ho númeru totál alunu tenke 200-resin, se lae labele loke. Atu loke eskola paralelu ne’e, tenke apoiu hosi inan ho aman,” Martino Amarál Cova hato’o rekomendasaun ne’e ba Agência Tatoli, iha resintu CVTL, Kampung Baru, kinta ne’e.

Aleind ene’e, nia husu ba Governu di’akliu loke eskola sekundária katólika duké aumenta loke tan eskola sekundáriu jerál paralelu iha Covalima.

“Ha’u-nia hanoin duké Governu atu loke eskola sekundáriu jerál paralelu atu halo oinsa maibé di’akliu loke eskola sekundáriu katólika. Se lae, Governu kria konfuzaun no atu trava edukasaun Timor-Leste la ba oin, kuríkulu la klaru no iha terrenu profesór la profosionál,” nia dehan.

Razaun profesór la profesionál tanba tuir loloos profesór ne’ebé atu hanorin estudante tenke matenek dala rua mak bele hanorin estudante sira, la’ós naran ba hili ho nune’e ema ba tuur de’it no fó livru haruka estudante sira hakerek de’it.

Tanba ne’e, atu loke eskola paralelu importante mós jestaun administrativu no rekursu umanu ne’e sai xave, tanba se bainhira jestaun ladi’ak mak programa la la’o no iha rekursu umanu ne’e ema ida muda ema seluk.

Diretór Eskola Tékniku Vokasionál Akar Laran, Vidal de Jesus Moniz, hateten autoridade Covalima loke eskola sekundáriu jerál iha Covalima sei fó impaktu ba eskola tékniku vokasionál sira.

“Ha’u hanoin eskola sekundáriu jerál loke tan eskola paralelu ida-ne’e fó impaktu boot ba ami eskola tékniku vokasionál sira. Hhanesan antes loke ona eskola paralelu iha postu administrativu Tilomar, maibé to’o ikus taka tanba grupu balun aseita no balun la aseita,” nia esplika.

Ho nune’e, bainhira atu loke hikas ekola paralelu iha Tilomar la merese ona tanba antes ne’e loke ona eskola no taka hikas fali tanba komunidade la simu, nune’e presiza atu buka hikas fatin seluk.

Antes ne’e, administradór munisípiu Covalima, Francisco de Andrade, hateten razaun  autoridade Covalima  haruka proposta ba Ministériu Edukasaun Juventude no Desportu atu loke eskola sekundaria jerál paralelu, tanba haree ba realidade númeru estudante iha eskola Sekundáriu Jerál Públiku Suai boot liu no sala-de-aula la sufisiénte ba estudante sira.

Notísia Relevante:

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!