iklan

DILI

Acilino: Horta husu órgaun eleitorál aumenta partisipasaun eleitór iha estranjeiru

Acilino: Horta husu órgaun eleitorál aumenta partisipasaun eleitór iha estranjeiru

Diretór Jerál STAE, Acilino Manuel Branco. Imajen TATOLI/António ‘Dasiparu’ Gonçalves.

DILI, 18 novembru 2022 (TATOLI)—Prezidente Repúblika, Jose Ramos Horta, husu ba órgaun eleitorál sira atu hola medida hodi aumenta partisipasaun eleitór sira iha Estranjeiru iha eleisaun parlamentár ne’ebé sei realiza iha tinan 2023.

Informasaun ne’e hato’o husi Diretor-Jeral Sekretariadu Tékniku Administrasaun Eleitorál (STAE), Acilino Manuel Branco, hato’o kestaun ne’e bainhira hasoru malu no hala’o enkontru ho Prezidente Repúblika, José Ramos Horta.

“Prezidente Repúblika husu ba órgaun eleitorál sira atu hanoin kona-ba medida foun sira-ne’ebé kondusivu atu aumenta partisipasaun no garante direitu votu nian ba timoroan sira liuliu sira ne’ebé hela iha rai-li’ur,” Acilino Manuel Branco hateten hafoin enkontru ho Xefe Estadu, iha Palásiu Prezidensiál Nicolau, Bairru Pite, sesta ne’e.

Hosi medida sira-ne’e konsidera faktu katak taxa partisipasaun eleitór nian iha eleisaun prezidensiál iha ronde daruak la tun kompara ho iha ronda dahuluk.

“Tanba ne’e, ami aprezenta medida tolu ba Xefe Estadu atu aumenta númeru votante iha Estranjeiru. Ami hanoin hela kaixa bola eletróniku, estasaun votasaun barak liu no posibilidade atu vota sedu,” nia dehan.

Maske nune’e, órgaun eleitorál sira hanesan STAE no Komisaun Nasionál Eleisaun sei diskute medida adekuadu sira atu hatán ba preokupasaun Prezidente Repúblika nian.

Taxa partisipasaun iha eleisaun prezidensiál tinan 2022 aumenta ba 77.26% ne’ebé ekivalente ho eleitór hamutuk 647,172, kompara ho taxa ne’ebé fiksa ona iha 71.16% (743,150) iha tinan 2017.

Daudaun ne’e, STAE rejistu total eleitór hamutuk 859,613, iha nasionál hamutuk 852,500 no iha diáspora hamutuk 7.113.

Jornalista : Osoria Marques

Editór       : Cancio Ximenes

iklan
iklan

Leave a Reply

iklan
error: Content is protected !!