iklan

DILI

AHDMTL triste Governu la fó prioridade ba asuntu “Ema ho Defisiénsia”

AHDMTL triste Governu la fó prioridade ba asuntu “Ema ho Defisiénsia”

Diretór Interinu AHDMTL, Gabriel Ponciano de Sousa. Imajen Tatoli/Francisco Sony

DILI, 18 novembru 2022 (TATOLI)—Diretór Ezekutivu Asosiasaun Halibur Defisiénsia Matan Timor-Leste (AHDMT), Gabriel Sousa, AHDMTL triste tanba Governu la fó prioridade ba asuntu Ema ho Defisiénsia (EhD).

“Bainhira hetan informasaun ida-ne’e, reprezentante ema ho difisiénsia sente triste uitoan tanba orsamentu ba asuntu difisiénsia kiik no Governu la fó prioridade ba asuntu ema ho difisiénsia, ida-ne’e mak ami-nia lamentasaun,” Diretór AHDMTL ne’e dehan ba jornalista sira, iha eskritóriu AHDMTL Manleuana, sesta ne’e.

Diretór hatutan, Governu hanoin netik karik iha alternativu seluk atu bele tulun ema ho difisiénsia matan ne’ebé moris iha nasaun ida-nee atu labele lakon sira-nia direitu hanesan mós sidadaun sira seluk.

Nune’e, fó hanoin ba Governu atu bele haree asuntu defisiénsia tanba asuntu defisiénsia la’ós ba organizasaun defisiénsia sira de’it maibé ba ema hotu-hotu. Ho ne’e, nia husu Prezidente Repúblika veta orsamentu jerál Estadu 2023 tanba la reflete ba ema ho defisiénsia sira-nia nesesidade.

“Orsamentu 1,4% ne’e la responde no la refleta mai ema ho defisiénsia iha Timor laran tomak ho totál ema hamutuk 38.118 ninia nesesidade. Hanesan organizasaun ida-nee reprezenta ema ho defisiénsia matan iha rai ida-ne’e. Ha’u rekomenda ba Prezidente Repúblika atu bele veta OJE ida-ne’e, nune’e sira bele haree di’ak fila-fali asuntu ema ho defisiénsia liu-liu orsamentu ba setór produtivu sira,” nia dehan.

Antes debate orsamentu ba tinan 2023, AHDMTL halo ona audiénsia ho
Prezidente Konsellu Ministru (PCM siglá-portugés), hodi haree asuntu refere.

“Ha’u hanoin katak atu halo deklarasaun ida ba públiku katak ligadu ho ha’u-nia pozisaun no hosi asosiasaun-nia pozisaun katak antes preparasaun orsamentu ami halo ona avdokásia hodi halo audiénsia ho PCM. Ami mós fó hanoin atu bele prepara mós orsamentu ba asuntu defisiénsia nian tanba ami-nia advokásia ida-ne’e, ami reflete fila ba iha loron 4 jullu iha uma fukun Parlamentu ratifika konvensaun internasionál direitu ba ema ho difisiénsia,” nia haktuir.

Reprezentante ema ho defisiénsia ne’e haktuir katak iha pontu importante tolu mak iha ne’ebá define klaru iha konvensaun ne’e dehan tenke implementa edukasaun inkluzivu la’o ho di’ak tinan 2023, tenke kria asesibilidade ba edifísiu públiku sira no mós tenke rekruta mós ema ho defisiénsia sai funsionáriu públiku sira no mós iha ratifikasaun konvensaun ida-ne’e ba ema ho defisiénisa hetan promulgasaun hosi Prezidente Repúblika.

AHDMTL husu Governu ho seriédade fó atensaun makaas ba asuntu ema ho defisiénsia tanba sira mós inklui sidadaun ba rai ida-ne’e.

“Agora ita hotu-nia preokupasaun liu-liu asosiasaun-nia pozisaun lamenta tebes bainhira asesu kona-ba Orsamentu Jerál Estadu (OJE) 2023, ida-ne’e nia montante boot maibé alokasaun ba ema ho defisiénsia ne’e kiik kuaze 1,4%. Ne’e kiik iha proposta rua hosi proposta 49 no 50 A ne’ebé mak husu atu aumenta osan ba ema ho defisiénsia iha Ministériu Soliedariedade Sosiál no Inkluzaun (MSSI) no Ministériu Edukasaun Juventude no Desportu (MEJD) rasik, maibé proposta rua ne’e la pasa,” nia hateten.

Tanba ne’e, sira-nia parte sente triste tebes ho informasaun katak sira-nia proposta la pasa iha Parlamentu Nasionál.

Tuir nia katak tinan-tinan ema ho defisiénsia aumenta ba beibeik no barak mak to’o ona idade maibé ladauk iha billete identidade no seidauk asesu mós ba subsídiu ema ho defisiénsia nian.

“Situasaun reál ema ho defisiénsia iha munisípiu barak mak seidauk asesu ba subsídiu no barak seidauk iha dokumentu liu-liu hanesan iha estatál ema ho defisiénsia balun idade 20, balun 25 maibé sira rasik laiha kartaun eleitóral, laiha billete identidade. Entaun, rekomenda nafatin ba Governu para tau sériedade ba ida-ne’e liu-liu ba asuntu defisiénsia,” nia informa.

Bazeia ba sensu 2015 ema defisiénsia iha Timor-Leste hamutuk 38.118 ne’ebé kompostu hosi defisiénsia matan ema hamutuk 14.828, defisiénsia tilun hamutuk ema 12.511, defisiénsia motora 7.466 no difisiénsia psiko mentál 3.313.

Jornalista : Osoria Marques

Editór      : Cancio Ximenes

iklan
iklan

Leave a Reply

iklan
error: Content is protected !!