DILI,18 novembru 2022 (TATOLI)—Tuir dadus estatistika hahú hosi janeiru to’o setembru, Ministériu saúde rejista pasiente iha territóriu nasionál na’in-20.197, hosi numeru ne’e laiha obitu.
“Pasiente sofre pneumonia na’in-20.197, kompostu hosi mane na’in-10.492 no feto 9.705”, hateten Diretór Nasionál Saúde Públika Ministériu Saúde, Frederico Bosco ba TATOLI iha nia kna’ar fatin Caicoli, kinta ne’e.
Moras ne’e afeta ba labarik menus tinan haat na’in-6.452 no bebé menus tinan ida na’in-3.660.
Nia esplika, moras ISPA mak dezenvolve ona ba moras pneumonia no komplikasaun ba pulmaun bubu, nune’e balun baixa no balun halo tratamentu ambulatoriu ikus sira rekupera hotu.
“Moras pneumonia ne’e afeta mai husi bakteria no virus dalabarak kauza husi fuma no ahi-suar , maibé bainhira moras ona halo taratamentu lalais iha sentru saúde sira ne’ebé mak besik bele rekupera ho lalais”, nia afirma.
Ministériu Saúde rejista no ema ho moras Infesaun Vias Respiratóriu hamutuk 369.981, kompostu hosi mane 158.671 no feto 211.310.
Nune’e mos MS rejista moras diarea ho raan husi labarik idade menus tinan ida na’in-153, kompostu mane 86 no feto 67. Enkuantu moras scabies afeta ba labarik menus tinan ida hamutuk 477 , mak mane 271 no feto 206.
Jornalista :Felicidade Ximenes
Editór : Florencio Miranda Ximenes
