iklan

EKONOMIA, HEADLINE

MTKI selebra kontratu ho empreza rua estabelese Loja do Povo

MTKI selebra kontratu ho empreza rua estabelese Loja do Povo

Diretora empreza Nova Casa Fresca, Hergui Luina Fernandes Alves (liman karuk) no Ministru Turizmu, Komérsiu no Indústria, José Lucas do Carmo da Silva (liman loos), akompaña ho tékniku sira, asina kontratu estabelese Loja do Povo iha munisípiu Dili no Manufahi. Imajen/MTKI

DILI, 18 novembru 2022 (TATOLI)–Ministériu Turizmu, Komérsiu no Indústria (MTKI), sesta ne’e, selebra akordu ho empreza nasionál Nova Casa Fresca Unipessoal Lda, no Hibatirrokab Nunes Unipessoal Lda, hodi estabelese Loja do Povo.

Kontratu ne’e asina hosi Ministru Turizmu, Komérsiu no Indústria, José Lucas do Carmo da Silva, no na’in ba empreza rua, iha edifísiu MTKI, Bebora.

“Ministériu selebra asina kontratu Loja do Povo ba daruak ho parseiru. Programa ne’e importante tebes ba ministériu hodi diversifika ekonomia rai-laran, halo promosaun no fasilita produtór sira iha ortikultura, agrikultura, peska, no pekuáriu. Ita hatene durante ne’e maluk hakiak-na’in no to’os-na’in sira halo produsaun maibé produtu hirak ne’e dodok, sasán iha merkadu folin tun. Tanba ne’e, Loja do Povo estratéjiku tebes atu halo koneksaun povu ho merkadu,” Ministru José do Carmo, hateten liuhosi nota ne’ebé Agência Tatoli asesu, sesta ne’e.

Empreza Nova Casa Fresca Unipessoal Lda sei responsabiliza iha Loja do povu iha Dili, enkuantu Hibatirrokab Nunes Unipessoal Lda iha munisípiu Manufahi, ho valór kontratu ba kada empreza $50.000.

Notísia relevante: Ezisténsia ‘Loja do Povo’ atu kria merkadu ba produtu lokál

Governante ne’e konsidera Loja do Povo importante ba ekonomia rai-laran, tanba ne’e presiza iha komunikasaun, kooperasaun no kordenasaun di’ak nafatin entre empreza ho ministériu atu nune’e rezultadu bele hetan ho másimu no iha impaktu di’ak iha merkadu.

Antes ne’e, MTKI lansa uluk ona Loja do Povo tolu no ohin loron iha tan akordu hodi estabelese tan iha fatin rua.

“Ne’e hanesan pasu importante,  fó esperansa no insentiva produtór sira atu prodús barak liután. Tanba ne’e, husu ita atu iha kordenasaun no kooperasaun di’ak ho orsamentu $50.000 atu ita hetan nia sustentabilidade iha obra ne’e, nune’e husu atu ita serbisu ho efikásia no efisiénsia liután,” Ministru fó hanoin.

Aleinde ne’e, governante ne’e husu ba empreza rua atu asume responsabilidade hanesan timor-oan atu konsidera agrikultór ho grupu hotu.

“Husu ita atu akomoda agrikultór sira hotu nia produtu, atu nune’e iha duni sentidu katak Governu ninia obra serbí ba nia sidadaun sira hotu no hakarak relembra ita hotu, maski ita ho pilotu kiik maibé nia sustentabilidade no benefísiu ba timor-oan, liu-liu ba maluk agrikultór sira hotu. Ida-ne’e hanesan oportunidade, maibé husu atu tane-a’as responsabilidade,” nia tenik.

Biban hanesan, Diretora empreza Nova Casa Fresca, Hergui Luina Fernandes Alves, agradese ba konfiansa tanba fó oportunidade loke Loja do Povo iha Dili no Manufahi.

Emrezária Feto nasionál ne’e dehan, durante ne’e empreza hala’o serbisu hamutuk ho komunidade halo produsaun iha fatin ortikultura durante tinan-hitu hodi liga produtu hosi produtór sira ba merkadu, liu-liu iha kapitál Dili maibé iha difikuldade ne’ebé hasoru mak inserteza merkadu.

“Dalabarak produtu lori bá merkadu iha rejeisaun hosi loja sira ho razaun katak over production, maski iha loja laiha produtu fresku,”| nia adianta.

Nia konsidera, polítika Governu hamosu Loja do Povo ne’e importante atu nune’e bele insentiva produtór sira hasa’e produsaun ho produtu saudável no presu razoável.

“Ita hotu iha responsabilidade garante produsaun iha rai-laran, ita iha soberania Estadu, labele bebeik produtu ne’ebé maka ita han loron-loron hein importasaun hosi rai-li’ur no objetivu ida seluk maka ami hakarak subtitui importasaun,” Diretora empreza otimista.

Hergui Luina, dehan, ezisténsia Loja do Povo hanesan dalan ida atu apoiu atividade empreza iha munisípiu seluk hodi hasa’e liután produsaun no ajuda ekonomia povu agrikultór, maski orsamentu ne’e la sufisiente, maibé empreza iha responsabilidade atu hasa’e kualidade ba investimentu no hatudu produsaun rai-laran ba país seluk.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!