Pesoál saúde 45 tuir formasaun kona-bá vasina rútina iha Baucau
BAUCAU, 18 novembru 2022 (TATOLI) – Pesoál saúde hamutuk na’in-45 hosi sentru saúde sia iha munisípiu Baucau tuir formasaun advokasia hosi diresaun saúde públika departamentu promosaun saúde Ministériu Saúde (MS) nian.
Tékniku hosi diresaun saúde públika departamentu promosaun, Estevão Mariz, hateten, objetivu atividade refere atu pesóal saúde sira bele hatene halo komunikasaun ho komunidade molok implementa kampaña rútina integradu ba iha eskola alvu.
“Ami fó orientasaun, matéria nune’e sira mak sei ba iha sentru saúde, postu saúde no ba iha komunidade iha suku, aldeia no mós eskola sai hanesan ami-nia alvu,” Estevão Mariz hateten iha Riamare, sesta ne’e.
Atividade implementasaun kampaña integradu hanesan vasina sarampu, rubella, PCV, póliu, vitamina A no alvendazol ba labarik idade tinan lima mai kraik.
Juliana da Costa Freitas hosi sentru saúde Baguia, konsidera atividade refere importante ba pesoál saúde hotu nune’e bainhira implementa vasina iha terrenu tuir matadalan saúde nian.
“Hanesan ema pesoál saúde hato’o lia agradesimentu ba Ministériu Saúde tanba liuhosi advokasia, ami bele hanorin ita-nia komunidade kona-ba ai-moruk hirak-ne’e,” Juliana Freitas hateten.
Diretór servisu munisipál saúde Baucau, Domingos Reinaldo Guterres, husu ba profisionál saúde atu halo liña koordenasaun ho autoridade lokál hanesan xefe suku no xefe aldeia, juventude suku no relijiaun, sosiedade sivíl hamutuk fó susesu kampaña integradu iha baze.
Jornalista : Natalino Belo
Editór : Evaristo Soares Martins
