Populasaun 16,961 iha Covalima simu ona vasina Booster Pfizer
COVALIMA, 18 novembru 2022 (TATOLI)–Diretora Servisu Saúde Covalima, Maria de Fátima Moniz, relata daudaun ne’e populasaun ne’ebé simu ona vasina Booster Pfizer iha munisípiu Covalima hamutuk na’in-16,961.
“Daudaun ne’e ita-nia populasaun ne’ebé simu ona vasina booster pfizer ne’ebé mak ita hala’o iha postu administrativu hitu no ita reintegra ona ba servisu vasina rutina provizóriu, ita kobre ona vasina Booster Pfizer nian iha 41.5% ekivalente ba númeru sidadaun 16,961 mak simu ona vasina ona maibé pesoál saúde sira kontinua fó vasina,” Maria de Fátima Moniz, informa dadus ne’e ba Agência Tatoli, iha resintu AMC, Sukaer Laran, sesta ne’e.
Hafoin ministériu saúde integra vasina COVID-19 ba iha vasina rutina, pesoál saúde Covalima hetan apoiu espesiál hosi nasionál durante fulan-ida, tanba ne’e numeru kobertura vasina iha Covalima atinje ona 41,5%.
“Ita iha apoiu espesiál ba munisípiu Covalima durante fulan-ida, bazea ba ita-nia atinjementu vasina rutina ne’ebé durante ne’e ita ladún foku, tanba ita foku ba kampaña vasina COVID-19,” nia hateten.
Tanba ne’e, pesoál saúde sira kontinua esforsu atu hasa’e kobertura vasina iha Covalima ba sidadaun sira-ne’ebé seidauk vasina, servisu saúde Covalima fó alvu ba sentru saúde sira hanesan iha sentru saúde Zumalai no Suai kada loron tenke atinje númeru na’in-75, maibé sira liu númeru refere.
“Ita presiza atu hasa’e ita-nia kobertura vasina rutina komesa iha segunda foin lalais ne’e, ami halo ona númeru alvu sentru saúde atu kobre loron ida hanesan sentru saúde Zumalai loron-ida kobre sidadaun na’in-75 no sentru saúde Suai mós hanesan,” nia dehan.
Sentru saúde Fohorem, Tilomar no Maucatar kada loron kobertura numeru vasina ema na’in-20 no iha sentru saúde Fatumea no Fatululik kada loron atinje ema na’in-15, maibé kada loron sentru saúde sira liu fó númeru.
Sentru saúde sira iha munisípiu Covalima hanesan sentru saúde Zumalai alvu na’in-75 maibé sira liu alvu bele atinje fó vasina ba sidadaun na’in 100-resin, sentru saúde Suai mós númeru hanesan ho sentru saúde Zumalai, sentru saúde Fatumea númeru alvu 15 maibé sira relata dadus na’in-18
Ho nune’e, atinjementu loron-ida vasina ema na’in-224 nune’e semana ida-nia laran sidadaun simu vasina na’in-1,115, ne’ebé atinje servisu iha vasina rutina apoiu durante semana haat (4) ne’e kada loron atinje liu númeru ne’ebé fó meta ba sentru saúde sira.
“Númeru ne’ebé pesoál saúde sira atinje, sidaduan sira-ne’ebé vasina iha Covalima hamutuk na’in-16,961, tanba vasina ita la’o ho vasina saúde na familia reintegra infomasaun no dezaminasaun ne’ebé ami fó liuhosi advokasia ba autoridade lokál. Eentaun, sira disemina informasaun tutan, ami fó ba iha ami-nia komunidade sira,” nia esplika.
Jornalista : Celestina Teles
Editór : Cancio Ximenes
