COVALIMA, 18 novembru 2022 (TATOLI)–Diretora Servisu Saúde Covalima, Maria de Fátima Moniz, hateten progresu konstrusaun postu saúde iha suku Beiseuk, postu administrativu Tilomar atinje ona 77%.
“Ha’u halo ona vizita konstrusaun postu saúde iha fulan tolu ba kotuk, ami halo supervizaun kompañia abandona servisu. Hafoin halo supervizasaun, ha’u haruka nota informasaun ba Ministériu Saúde no administradór hodi hatudu nia rezultadu pozitivu. Progresu konstrusaun postu saúde Beiseuk, postu administrativu Tilomar atinje ona 77%,” Maria de Fátima Moniz hato’o ba Agência Tatoli iha resintu AMC, Sukaer Laran, sesta ne’e.
Hafoin haruka karta nota informasaun ba Ministériu Saúde halo observasaun direita no kompañia mós hahú halo konstrusaun obra ne’e hodi halo atendimentu mós ba programa violénsia bazea ba jéneru.
Konstrusaun postu saúde iha Tilomar to’o ohin loron, kompañia seidauk finaliza tanba antes ne’e kompañia abandona servisu.
Bazea ba kontratu Postu Saúde Raihun, suku Beiseuk, postu administrativu Tilomar ne’e, konstrui hosi kompañia Carame Unipesoál, Lda, ne’ebé hahú halo konstrusaun iha 18 agostu 2021 no sei finaliza 17 fevreiru 2022, maibé to’o ohin loron seidauk finaliza konstrusain no foin atinji 77% ne’ebé ho totál orsamentu $295,785.42.
Jornalista : Celestina Teles
Editór : Cancio Ximenes
