iklan

NASIONÁL, POLÍTIKA

Sosiedade Sivil husu PN halakon pensaun vitalísia

Sosiedade Sivil husu PN halakon pensaun vitalísia

Sosiedade Sivil liuhosi Forum Organizasaun Naun Govermentál Timor-Leste (FONGTIL) husu Parlamentu Nasionál (PN) atu rona manifestante sira-nia ezijensia kona-ba halakon pensaun vitalisia. Imajen/Doc. Tatoli.

DILI, 18 novembru 2022 (TATOLI)—Sosiedade Sivil liuhosi Forum Organizasaun Naun Govermentál Timor-Leste (FONGTIL) husu Parlamentu Nasionál (PN) atu rona manifestante sira-nia ezijensia kona-ba halakon pensaun vitalisia hodi fó importánsia ba investimentu setór produtivu sira.

“Husu ba Parlamentu Nasionál atu rona ezijénsia manifestante sira-nian kona-ba halakon pensaun vitalisia no fó importánsia ba investimentu setor produtivu sira,” Portavós Sosiedade Sivil, Antonio Delimas, hateten liuhosi konferénsia imprensa relasiona ho estudante sira hosi Aliansa Maubere Nasionál (AMN) ne’ebé halo manifestasaun hodi kontra desizasaun Parlamentu Nasionál (PN) sosa karreta no laptop ba deputadu sira, ne’ebé hala’o iha Salaun FONGTIL, Caicoli, Dili, sesta ne’e.

Portavós ne’e hateten, tuir manisfestante no públiku katak polítika sosa karreta ne’e desnesesáriu no la refleta ba situasaun hafoin post COVID-19, ne’ebé Timor-Leste enfrenta krize ekonomia no ema barak lakon servisu kauza hosi COVID-19 no Governu moris sein orsamentu durante tinan tolu (3), iha ne’ebé afeta kedas ba movimentu no kresimentu ekonomia.

Tanba ne’e, nia husu ba Parlamentu Nasionál no orgaun Estadu sira hotu atu respeitu espasu síviku neʼebé konsagra iha Konstitusaun RDTL artigu 42.

“Husu mós ba PNTL atu halo atuasaun ba manifestasaun ho aproximasaun persuasivu, la’ós ho violénsia,” nia dehan.

Aleinde ne’e, FONGTIL husu ba Parlamentu Nasionál atu respeita autonomia kampus hodi la orienta Polísia Nasionál Timor-Leste (PNTL) tama to’o áreadór kampus nian.

Husu mós ba orgaun Estadu sira hotu atu mantein Timor-Leste nia sistema demokratizasaun liuhosi hadook an hosi violasaun ne’ebé kontra Timor-Leste nia prínsipiu do Estadu no Konstituisaun.

“Ami husu Nai deputadu/a sira atu ezije Governu atu labele ignora situasaun grave rai-naruk fiskál no foti asaun apropriadu atu implementa planu sustentável no asegura katak planu despeza haktuir realidade finansa Estadu,” nia dehan.

Nune’e, FONGTIL husu ba Deputadu/a sira atu hakotu ona komunikasaun polítika ida-ne’ebé mak la saudavel no utiliza linguajen ne’ebé promove komunikasaun polítika ne’ebé edukativu atu kontribui ba pás no establidade hodi kontribui ba atinjementu objetivu Estadu ne’ebé hatur artigu 6 iha KRDTL.

Aliende ne’e, husu ba PDHJ atu loke prosesu investigasaun ba aktu kapturasaun no detensaun arbitrária ne’ebé mak halo hosi Komandu PNTL Munisipiu Dili no Unidade BOP.

Nune’e mós, husu ba movimentu estudante universitáriu atu kumpre regra manifestasaun nian hodi asegura ambiente ne’ebé kondusivu no livre hosi tentasaun konflitu horizontál.

Maske nune’e, nia hateten, kapturasaun no detensaun ilegál ne’ebé mak Komandu Polísia Nasionál Timor-Leste (PNTL) Munisipiu Dili halo ba Korlap Miguel Arcanso Mosil, liuhosi Ajénte Polísia mai fó hatene atu lori ba halo koordenasaun ho Komandu Munisipiu Dili, hodi muda fali fatin demonstrasaun ba Benfica.

Maibé la’ós lori ba halo ko’ordenasaun no distánsia tuir lei Nú. 1/2006, maibé lori ba detein sein justa kauza; asaun ida-ne’ebé komete hosi komandante PNTL Munisipiu Dili viola KRDTL artigu 33 no 31 no Deklarasaun Universál Direitu Umanu Artigu 9 no Polísia hamate Liberdade opiniaun sidadaun no hato’o sira-nia oponiuan ne’ebé sita mós iha artigu 19, inklui artigu 40 KRDTL (Liberdade Espresaun no Informasaun).

Tanba, tuir Rede Defensór Direitu Umanu (RDDU) nia observasaun manifestante sira dook hosi Parlamentu Nasionál, maibé saida mak akontese durante asaun demostrasaun grupu Polísia iha fillera oin haruka manifestante sira muda ba oin, maibé la to’o minutu rua (2) derrepente BOP duni manifestante sira fila seim iha asaun ruma ne’e prátika hosi manifestante sira.

“Ami konsidera atuasaun Komandu Munisiplu Dili kontra Konstituisaun Artigu 147, ne’ebé hateten katak Polísia defende legaldade demokrátiku no garante sidadaun sira-nia seguransa interna maibé labele iha Partidu Polítiku. Ami nota katak Komandu Munisipiu Dili no Unidade BOP hala’o atuasaun iha tendénsia polítika no la obedese ba orden konstitusionál, inklui Lei organika PNTL nian-Lei Nú. 9/2009 alinea 2-3 no rejime jurídiku uzu forsa Dekreitu-Lei Nú. 43/2011,” nia hateten.

Postavós ne’e hateten, FONGTIL nu’udár mahon ba ONG sira hotu, tantu nasionál no internasionál hamutuk 250 ho nia mandatu mak halo kapasitasaun ba membru, halo koordenasaun no advokásia.

FONGTIL mós nu’udar parseiru estratéjiku Governu nian ba konstrusaun Estadu liuhosi kooperasaun servisu iha setór oioin ne’ebé halo hosi membru sira no partikulármente nu’udár sekretariadu FONGTIL halo koordenasaun servisu ho orgaun Estadu sira, ajénsia dezenvolvimentu no parseiru estrátejiku sira seluk.

Nu’udár elementu ida hosi sosiedade sivil, FONGTIL ho nia membru mós sempre hato’o nia opiniaun krítiku ba asuntu sosiál kultura, ekonomia polítika no asuntu relevante sira-ne’ebé liga ba dezenvolvimentu nasionál.

FONGTII halo papel iha prosesu ne’e liuhosi fó opiniaun krítiku, paresér no peskiza sira no mós apoiu prosesu dezenvolvimentu ne’ebé kontribui hosi membru FONGTIL sira, bazea planu programa membru ida-idak nian no halo ajustamentu ba programa dezenvolvimentu nasionál ne’e rasik.

Nune’e, FONGTIL hakarak hato’o apresiasaun ba esforsu tomak Governu nian ne’ebé prepara ona proposta OJE 2023 no apresia mós ba Parlamentu Nasional ne’ebé halo debate krítiku ba proposta OJE 2023.

“Tanba ne’e, ami mós hakarak fó apresiasaun ba Parlamentu Nasionál ne’ebé rona opiniaun públiku no protesta hodi halo kanselamentu ba proposta sosa kaereta Prado no laptop ba membru Parlamentu Nasionál ba ano fiskál 2023 nian,” nia hateten.

Entretantu, manifestante sira hala’o asaun demonstrasaun iha resintu Universidade Nasionál (UNTL) oin, hodi kontra desizaun Parlamentu Nasionál liuhosi orsamentu privativu PN 2023 ne’ebé tau osan hamutuk millaun $1.95 hodi sosa karreta ho marka Pajero Sport, inklui halakon Lei Pensaun Mensálal Vitalísia.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!