BAUCAU, 19 novembru 2022 (TATOLI)—Formandu nain-60 hosi Sentru Formasaun Dezenvolvementu Komunitáriu (CDC, sigla Portugés) munisípiu Baucau destaka formandu sira ba munisípiu haat atu hala’o estajiu iha baze durante fulan-ida.
Diretór Sentru Formasaun Dezenvolvementu Komunitária, Vicente Matos Belo, hateten formandu 60 ne’e sei destaka ba munisípiu sira iha loron 18 novembru liu-liu iha Lautém koloka nain-10, Baucau nain-20, Aileu na’in-15 no Cavalima nain-15 hodi bele implementa matéria sira-ne’ebé durante sira hetan liuhosi teoria hodi hatudu iha prátika.
“Formadu sira kuaze aplika hotu hafoin ramata formasaun, tanba ne’e ami konsidera sertifikadu ne’ebé sira hetan hanesan bukae ida ba sira ba iha futuru,” Diretór ne’e informa ba Agência TATOLI iha suku Triloka, Baucau, sábadu ne’e.
Formandu hirak ne’e sei hala’o sira-nia estájiu iha CTT Salele-Suai, Seloi Ortikultura Aileu, Grupu juventude agrikultura Mehara Lautém no Sentru peskiza agrikultura Triloka no Bucoli Green suku Bucoli munisípiu Baucau.
Bainhira finaliza estájiu sei kontinua hakerek relatóriu no hala’o avaliasaun liu-liu kona-ba prestasaun durante formasaun iha CDC. “Faze sira hanesan ne’e parte kriteriu ba formandu sira atu kumpre antes iha fulan-dezembru halo graduasaun,” Vicente Belo hateten.
Durasaun formasaun hamutuk fulan-ualu kompostu hosi fulan-haat katégoria sertifikadu um no fulan-haat seluk ba sertifikadu dois.
CDC rasik rejista formandu sira hosi munisípiu Sanulu ho tótal ema na’in-60 iha área agrikultura no tótal formadór iha CDC Baucau hamutuk nain-11.
Jornalista : Natalino Belo
Editór : Cancio Ximenes
