iklan

HEADLINE, SAÚDE

Doutór espesialista Austrália konsulta labarik ibun-sakat 200-resin iha HNGV

Doutór espesialista Austrália konsulta labarik ibun-sakat 200-resin iha HNGV

Doutór espesialista Plastic Surgeon hosi Austrália konsulta labarik ibun-sakat iha Hospitál Nasionál Guido Valadares (HNGV), Dili, sábadu. Imajen Tatoli/Felicidade Ximenes

DILI, 19 novembru 2022 (TATOLI)—Ekipa doutór espesialista Plastic Surgeon hosi Austrália, sábadu ne’e, hahú konsulta labarik ibun-sakat hamutuk 200-resin iha Hospitál Nasionál Guido Valadares (HNGV), Dili.

“Vizita ida agora daudaun ne’e ita haree katak pasiente barak, tanba afeta hosi COVID-19 entaun tinan tolu espesialista sira hosi Austrália la mai, agora mak sira mai fila-fali hodi halo hela konsulta ba labarik sira. Labarik sira barak, númeru loloos seidauk hatene maibé ita-boot sira haree  kuaze 200-resin mak iha ne’e,” Médiku Jerál Sirjiaun Hospitál Nasionál Guido Valadares (HNGV), João Ximenes, hateten ba jornalista sira iha HNGV.

Nia dehan, durante 2019 ne’e espesialista hosi Austrália mai halo operasaun no depois sira fila, doutór iha HNGV rasik halo opera ba labarik ibun-sakat simples hamutuk 30-resin.

“Durante ne’e, ha’u opera ona ema na’in-30 resin maibé ha’u bele opera ba sira-ne’ebé mak ibun sakat simples. Maibé ibun-sakat rua no ibun laran sakat ne’e labele opera, ita bolu dehan komplikadu entaun ida-ne’e mak agora daudaun prioridade atu halo operasaun,” nia dehan.

Antes atu operasaun sei haree uluk labarik sira-nia kondisaun sira tenke forte, atu nune’e atendimentu ne’e la’o di’ak.

“Ami atu opera mak dahuluk sira mai konsulta haree sira-nia kondisaun tenke forte labele mear, labele isin-manas no doutór hosi anastesia sira, sei haree nia paru-paru no sira-nia fuan ne’e moos ka lae. Tanba, banhira ba opera sei halo sira toba dukur mak hafoin halo operasaun para labele iha komplikasaun ruma, maibé karik sira atu opera ami haruka sira ohin tenke baixa para aban opera. Banhira hotu mak ami haruka sira alta fila ba uma,” nia hateten.

Médiku jerál ne’e informa, kauza hosi ibun-sakat ne’e seidauk hatene loloos tanba infesaun ruma durante bebé iha inan nia knotak to’o moris mai. Maibé fatór balun mai hosi jénetiku ka jerasaun. Iha teoria balun dehan iha inan nia knotak hahan ka alimentasaun ladún di’ak no balun dehan durante labarik iha knotak, inan sira hemu ai-moruk la tuir reseita doutór nian.

“Agora daudaun ami fó konsulta, aban mak ami halo operasaun to’o loron 24 novembru 2022. Depois doutor sira fila, ami sira hela kontinua halo operasaun ba kazu ibun-sakat simples sira ne’e maibé haree ba sakat boot liu, ami rejista hamutuk hein espesialista sira fila-fali mai mak halo operasaun,” nia dehan.

Nia relata, doutór espesialista hosi Austrália nian hamutuk na’in-rua mak daudaun ne’e iha ne’e, nune’e  aban halo operasaun ba labarik sira idade fulan-haat ba leten no na’in-ida (1) orsida sei too tan entaun na’in-tolu mak sei haree ba labarik sira ho problema ibun-sakat.

Mediku Jerál Sirujiaun HNGV husu ba Governu liu-liu Ministériu Saúde atu aumenta rekursu umanu ba iha operasun ibun-sakat nian, tanba daudaun ne’e espesialista ba ida-ne’e seidauk iha atu atende ba labarik sira-ne’ebé mak problema ho ibun-sakat.

“Ha’u husu ba nai-ulun sira aumenta ekipamentu médiku ba iha operasaun ibun-sakat nian tanba daudaun ne’e ekipamentu la sufisiente hodi halo tratamentu liu-liu kabas no ai-moruk sira seluk,” nia dehan.

Aleinde ne’e, ekipa espesialista plastic surgeon hosi Austrália ne’e halo operasaun ba ibun-sakat, ahi han, bee-manas luas  ne’ebé halo liman ka ain belit ba malu.

Jornalista : Felicidade Ximenes

Editór       : Cancio Ximenes

iklan
iklan

Leave a Reply

iklan
error: Content is protected !!