iklan

EKONOMIA, BOBONARO, HEADLINE, INKLUZAUN SOSIÁL, MUNISÍPIU

Autoridade Protesaun Sivíl apoia vítima inundasaun iha Cailaco

Autoridade Protesaun Sivíl apoia vítima inundasaun iha Cailaco

Prezidente Autoridade Munisípiu Bobonaro, Ernesto de Oliveira Barreto, entrega hela apoiu emerjénsia ba vítima inundasaun iha suku Atudara, postu administrativu Cailaco, munisípiu Bobonaro. Imajen Tatoli/Sérgio da Cruz.

BOBONARO, 21 novembru 2022 (TATOLI) – Autoridade Protesaun Sivíl (APC, sigla portugés), munisípiu Bobonaro, serbisu hamutuk ho autoridade munisipál, segunda ne’e apoia emerjénsia ba vítima inundasaun uma-kain 13 hosi suku Atudara no suku Purugua, postu administrativu Cailaco, munisípiu Bobonaro.

Vítima hirak-ne’e hetan apoia tanba akontese udan-boot iha loron  sesta, 18 novembru no loron sábadu, 19 novembru 2022, rezulta korrente mota Cla-Ola, Cera-Si no mota Rai-Luli Atudara lori lakon sira-nia sasán uma-laran no animál.

Apoia emerjénsia ne’e distribui ba komunidade suku Purugua uma-kain ida no suku Atudara uma-kain 12, komposta hosi sasán pakote food item hanesan; foos saka ida, mina bimoli, xá, masin-midar,  kafé, ikan-lata, supermi kaixa ida, susubeen dancow, buskuit no koto.

Enkuantu pakote non food item komposta hosi sanan, taxu, bikan, kanuru, lona, rinso, gayung, toalla, biti, manta no sabaun.

Notísia relevante: Protesaun Sivíl Bobonaro preparadu projete komunidade hosi risku dezastre naturál

Prezidente Autoridade Munisípiu Bobonaro, Ernesto de Oliveira Bareto, konsidera apoia ne’e nu’udar jestu solidariedade hosi Governu ba komunidade hodi tulun komunidade afetadu ba loron balun.

“Ida-ne’e tanba sira-nia fatin mota tama no mota estrada hotu sira-nia sasán, entaun ita tenke rekupera uitoan, maske la barak, maibé loron ida ka rua sira bele aguenta,” nia informa ba jornalista sira iha Cailaco, segunda ne’e.

Administradór postu administrativu Cailaco, Alfredo Meta-Dau, agradsede ba ekipa konjunta dezastre rápida tanba konsege halo intervensaun no responde ona komunidade sira-nia preokupasaun.

“Horisehik ami tún direita ba terrenu, identifika komunidade sira-ne’ebé afeta grave, natoon no ohin ita bele distribui ba sira-ne’ebé sasán uma laran bee lori, ba sira seluk nia dadus ita kontinua rekolla, aban ita tenke relata ona dadus ba munisípiu haruka ba nasionál,” nia subliña.

Luís Soares nu’udar abitante afetadu, sente kontente no agradese ba governu tanba apoia emerjénsia ho nesesidade bázika.

“Ha’u-nia sasán bele lakon, maibé ohin ha’u bele hetan ajuda hosi nai-ulun sira iha leten, ha’u sente kontente. Ida-ne’e bele ajuda ami loron rua ka tolu bele mós to’o semana ida tán,” nia katak.

Daudaun ne’e ekipa tékniku Programa Dezenvolvimentu Integradu Munisipál (PDIM) halo hela levantamentamentu dadus deskobre katak, korrente mota tolu ne’ebé sempre ameasa beibeik komunidade sira, nune’e bainhira iha ona planu atu halo konstrusaun bele proteje komunidade sira-nia uma, natar, to’os no plantasaun.

Notísia relevante: Protesaun Sivíl Bobonaro apoia ona vítima dazastre naturál uma-kain 72

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!