DILI, 21 novembru 2022 (TATOLI)–Ekipa Asia Pacific Hospice Palliative Care Network (APHN) hosi Singapura lidera hosi Diretór Ezekutivu, Giam Cheong Leong, segunda ne’e, kapasita profisionál saúde kona-ba kuidadu paliativu.
Programa formasaun ne’e hala’o durante loron-haat, hahú hosi loron 21 to’o 24 novembru 2022, iha salaun Hospital Nacional Guido Valadares (HNGV, sigla portugés).
Ministra Saúde, Odete Maria Freitas Belo, hateten, ekipa ANHP antes ne’e halo ona parseria ho Ministériu Saúde (MS) atu estabelese sentru onkolojia maibé la konsege hala’o tanba situasaun COVID-19.
“Ekipa ne’e mai atu haforsa reabilitasaun sentru ne’ebé Ministériu Saúde hamutuk ho HNGV inisia ona. Diretór ospitál nasionál hamutuk ho ninia komitiva sira preparadu atu simu filafali ekipa ne’ebé uluk halo ona kooperasaun, maibé la konsege no agora sira iha ne’e atu haree no kontinua filafali ita-nia parseria ne’ebé uluk halo ona. Ida-ne’e di’ak tebes tanba ita iha inisiativa ona depois sira mai, prontu haforsa liután saida mak ita hakarak atu halo,” Ministra Odete, hateten iha HNGV, segunda ne’e.
Notísia relevante: Janeiru-Fevereiru 2020, Pasiente 27 Hala'o Tratamentu iha Rai Liur
Tuir Ministra, estabelesementu sentru onkolojia atu tau-matan ba pasiente kankru, ne’ebé mak sempre transporta bá rai-li’ur hodi deteta no halo tratamentu.
“Parte ida-ne’e la’ós ona haree pasiente sira ne’ebé mak atu lori bá rai-li’ur, maibé ami iha posibilidade atubele deteta moras kankru iha ne’e. Ha’u espera, ninia kontinuasaun tratamentu hosi ekipa ida-ne’e ninia serbisu ba loron-haat nian,” Odete adianta.
Iha biban hanesan, Diretór Klínika HNGV, Marcelino Correia, informa, Timor-Leste iha ona akordu ho ekipa APHN desde tinan 2019 atu haruka uluk médiku sira tuir formasaun iha Singapura no mai haree laboratóriu patolojia, maibé labele realiza tanba pandemia.
“HNGV nafatin iha kooperasaun ho ajénsia iha ne’e, ikus liu sira deside atu mai halo observasaun saida mak durante ne’e ita prepara no saida mak la’o ona, atu nune’e iha kolaborasaun serbisu di’ak atubele halo atendimentu, tanba ita hanoin ona atu hahú serbisu onkolojia tanba daudaun estabelese ona unidade onkolojia iha HNGV,” nia tenik.
Nune’e, ekipa APHN sei halo observasaun ba HNGV hodi haree pasiente moras kankru tanba daudaun moras ne’e ho númeru a’as.
Jornalista : Antónia Gusmão
Editora : Julia Chatarina
