iklan

INTERNASIONÁL, DILI

Ekipa misaun apoia hosi TL kontribui reforsa sistema resensiamentu eleitorál Guiné-Bissau

Ekipa misaun apoia hosi TL kontribui reforsa sistema resensiamentu eleitorál Guiné-Bissau

Diretór Jerál STAE, Acilino Manuel Branco. Imajen TATOLI/Egas Cristóvão

DILI, 21 novembru 2022 (TATOLI)—Ekipa Misaun Apoiu prosesu resensiamentu eleitorál iha Guiné-Bissau, iha espetativa aas hodi realiza eleisaun iha tinan 2023 hodi kontribui reforsa sistema resensiamentu eleitorál iha Guiné-Bissau.

Diretór Jerál Sekretariadu Tékniku Administrasaun Eleitorál, Acilino Manuel Branco, hateten eleisaun lejizlativa antesipada iha Guiné-Bissau sei hala’o iha loron 18 fulan-dezembru 2022 maibé tenke adi’a ba loron 23 fulan-abril 2023.

“Prezensa hosi ekipa apoiu eleitorál Timor-Leste nian iha Guiné-Bissau kontribui atu reforsa sistema resensiamentu eleitorál founida, formasaun rekursu umanu sira hodi jere baze dadus nian liu-liu hosi Gabinete apoiu tékniku ba prosesu eleitorál Guiné-Bissau nian,” Acilino Branco, hateten ba Agência Tatoli, iha Caicoli, Dili.

Responsavél ne’e hatutan, Governu Guiné-Bissau liuhosi Xefe Estadu agradese ba serbisu ne’ebé hala’o ona durante fulan ida, tanba ne’e nasaun ne’e fó sertifikadu apresiasaun nian ba ekipa eleitorál TL nu’udar sinál agradesimentu ba povu no Governu Timor-Leste.

Nia dehan, ho orsamentu ne’ebé Timor-Leste disponibiliza ho montante millaun $1.5, no ho prezensa hosi ekipa misaun nian iha resensiamentu eleitorál, iha posibilidade atu salva fundu sira hodi sosa ekipamentu sira.

Ministru Administrasaun Estatál (MAE), Miguel Pereira de Carvalho, diskute ona kona-ba ekipa ne’ebé halo ona servisu ne’ebé efisiente iha Guiné-Bissau.

“Ho apoiu tékniku timoroan sira-nian, Guiné-Bissau iha baze dadus foun ida ba eleisaun parlamentár, ” nia hateten.

Ekipa misaun ne’e sei aprezenta relatóriu kona-ba serbisu ne’ebé hala’o ona iha sorumutu Konsellu Ministru nian. Ekipa misaun apoiu sensu hala’o tiha ona iha loron 30 fulan-setembru ba Guiné-Bissau no fila-fali mai iha Timor-Leste iha semana kotuk.

Ekipa ne’e kompostu hosi membru ualu (8) mak ida hosi Ministériu Negósiu Estranjeiru no kooperasaun (MNEK), na’in-tolu (3) hosi Ministériu Administrasaun Estatál (MAE) no haat (4) hosi Sekretaria Tékniku Administrasaun Eleitorál.

Jornalista : Osoria Marques

Editór      : Cancio Ximenes

iklan
iklan

Leave a Reply

iklan
error: Content is protected !!