iklan

EKONOMIA, HEADLINE

Empreza rua kontrata tan traballadór timor-oan 45 bá serbisu iha Austrália

Empreza rua kontrata tan traballadór timor-oan 45 bá serbisu iha Austrália

Diretór Nasionál Empregu Exteriór SEFOPE, Filomeno Soares. Imajen Tatoli/Egas Cristóvão

DILI, 21 novembru 2022 (TATOLI)—Empreza rua hosi Austrália hanesan Easy Pickings no Kilkoy Global Food, kontrata tan traballadór timor-oan 45 atu bá serbisu iha Austrália iha loron 25 novembru tinan ne’e.

Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), segunda ne’e, realiza serimónia despedida no asina deklarasaun entre família traballadór ho SEFOPE.

“Ha’u husu traballadór sira ne’ebé ohin asina ona deklrasaun, atu aproveita didi’ak oportunidade ida-ne’e hodi serbisu ho disiplina no husu ba inan aman, deklarasaun ne’ebé ohin ita asina ne’e ho objetivu katak buat ruma akontese ba ita-nia traballadór, ita hotu iha responsabilidade atu haree,” Diretór Nasionál Empregu Exteriór, Filomeno Soares, hateten, iha salaun DNEE, Becora.

Notísia relevante: Traballadór Austrália-Korea Sul Hatama ona Osan U$25,693,096.48

Nia dehan, traballadór 45 kompostu hosi mane 29 no feto 16, ne’ebé hosi númeru ne’e na’in-34 serbisu iha empreza Kilkoy Global Food no na’in-11 serbisu iha empreza Easy Pickings.

“Traballadór sira bá serbisu iha ema-nia rai la’ós permanente maibé temporáriu, nune’e bainhira bá serbisu tenke aproveita oportunidade atu hetan esperénsia no manán ema-nia osan, fila mai bele hadi’a ekonomia família no kresimentu ekonomia nasaun,” nia tenik.

Iha biban ne’e, nia apela ba joven timor-oan 45 ne’ebé hetan ona oportunidade bá serbisu atu hatudu komportamentu di’ak no labele halai ses hosi sistema, tambá sira maka sai save atu empregadór sira bele emprega tan joven 5.000 resin ne’ebé hein hela oportunidade iha sistema work ready pool SEFOPE.

Jornalista   : Arminda Fonseca

Editora        : Julia Chatarina

iklan
iklan

3 Comments

Leave a Reply

iklan
error: Content is protected !!