MESSK avalia padraun 11 ezisténsia ramu UNPAZ iha Covalima
COVALIMA, 21 novembru 2022 (TATOLI)–Ministériu Ensinu Superiór Siénsia no Kultura (MESSK) liuhosi ekipa avaliadór halo avaliasaun padraun 11 ezisténsia ramu Universidade da Páz (UNPAZ) iha Covalima.
“Ami-mai iha ne’e atu kumpre kadernu padraun kona-ba estabelese ensinu superiór públiku no pribadu ne’ebé mak foun hanesan ramu UNPAZ Covalima. Ami-mai atu haree kritériu obrigatóriu 11, sub kritériu obrigatóriu 57. Tanba ne’e, ohin ami halo enkontru ho prezidente fundasaun, reitór ho nia estrutura, ami husu pergunta ligasaun ba estabelesementu ramu UNPAZ,” Koordenadór ba ekipa avaliadór ba ramu UNPAZ Covalima, Paulino Ribeiro, hateten ba jornalista sira, iha kampus ramu UNPAZ Covalima, Kampung Baru, segunda ne’e.
Iha parte dader, ekipa avaliadór halo enkontru ho Reitór UNPAZ, Koordenadór ramu UNPAZ ho nia estrutura no hafoin enkontru iha parte lorokoraik ekipa avaliadór hosi MESSK halo site vizit.
Ekipa avaliadór nia prezensa iha ramu UNPAZ covalima hodi buka hatene bazea ba dokumentu ne’ebé mak UNPAZ haruka. Dokumentu ne’ebé UNPAZ haruka ba Ministériu Ensinu Superiór Siénsia no Kultura mai halo avaliasaun prelimináriu hodi haree rezultadu fízíku iha terrenu hanesan ho dokumentu ne’ebé UNPAZ haruka ka lae.
“Hafoin ami hasoru malu ho estrutura sei hasoru malu mós ho dosente atu rona informasaun ligadu ho rekursu umanu, Aban, ami sei halo site visit atu haree kondisaun hotu bazea ba dokumentu komprovativu ne’ebé mak UNPAZ submete ba Ministériu Ensinu Superiór atu komprova entre dokumentu ho rezultadu iha terrenu,” nia dehan.
Antes ne’e, MESSK haruka notifikasaun ba UNPAZ, maibé hafoin ne’e UNPAZ submete dokumentu komprovaitvu ne’ebé sira iha mak hanesan vizaun no misaun, objetivu, planu estratéjiku, entaun atu hato’o ba MESSK hafoin ministru hasai despaixu ba diretór jerál ensinu superiór nune’e tékniku atu halo verifikasaun dokumentu sira-ne’e
Ho prezensa ekipa avaliadór iha kampus UNPAZ ramu Covalima atu halo avaliasaun prelimináriu hodi kompara loloos bazea ba dokumentu ne’ebé mak UNPAZ haruka ba MESSK.
“ita bolu avaliasaun prelimináriu hodi halo kompara loloos hotu ona mak ministériu sei hasai lisensiamentu operasionál. Maibé liuhosi avaliasaun prelimináriu rezultadu hatudu ladún di’ak, ministériu sei hasai desizaun sei taka provozóriu ba ramu Covalima sei taka, maibé depende ba rezultadu ekipa avaliadór mai haree. Se pasa mak sei fó lisensiamentu ba sira ho durante tinan rua hafoin akreditasaun instituisionál, hafoin akreditasuan programátiku,” nia esplika.
Retór UNPAZ, Adolmando Soares Amarál reforsa, ekipa avaliadór nia prezensa iha ramu UNPAZ Covalima atu halo avaliasaun bazea ba proposta ne’ebé mak UNPAZ haruka ba MESSK.
“Ohin ita mai iha ne’e halo avaliasaun lisensa operasionál kampus ramu UNPAZ Covalima tanba ne’e ekipa avaliadór hosi MESSK sira-mai halo avaliasaun, tuir proposta ne’ebé mak ministériu hodi halo avaliasaun,” nia dehan.
Ekipa avaliadór sira hosi MESSK nia prezensa atu halo avaliasaun kona-ba padraun akreditasaun 11 ho indikadór 57. Sira mai atu konfirma bazea ba halo formulasaun proposta no iha terrenu hanesan ho formulasaun iha terrenu ka lae.
Hafoin ekipa avaliadór hosi MESSK finaliza enkontru ho estrutura UNPAZ sira mós sei kontinua halo site visit hodi halo rekomendasaun ba MESSK bele autoriza kampus ramu UNPAZ Covalima nia ezisténsia iha Covalima.
Ho nune’e, reitór mós iha esperansa katak ekipa avaliadór halo avaliasaun ne’e signifika ramu UNPAZ Covalima sei hetan lisensa operasionál.
“Ita hotu iha esperansa katak ramu UNPAZ Covalima sei hetan lisensa operasionál. Ita fiar ba futuru kampus ramu UNPAZ Covalima la’o hanesan kampus UNPAZ sentrál iha Dili,” nia hateten.
Jornalista : Celestina Teles
Editór : Cancio Ximenes
