iklan

DILI

OXFAM husu Governu investe orsamentu ba Ema ho Defisiénsia

OXFAM husu Governu investe orsamentu ba Ema ho Defisiénsia

Asesibilidade iha fatin públiku. Imajen/Escolavirtual

DILI, 21 novembru 2022 (TATOLI)—Portavóz OXFAM, Bruno Soares Saldanha, husu Governu investe orsamentu adekuadu ba Ema ho Defisiénisa (EhD) atu Governu bele prioritiza asuntu iha EhD iha Timor-Leste.

Asuntu ida-ne’e relata iha konferénsia imprensa ne’ebé hala’o iha edifísiu OXFAM hudi-laran, segunda ne’e. Ho ojetivu ida atu Governu bele prioritiza asuntu ema ho defisiénsia iha Timor-Leste.

“Ami hakarak Governu no Estadu Timor-Leste tenke halo investimentu orsamentu Estadu ne’ebé adekuadu hodi bele responde ba nesesidade ema ho defisiénsia sira-nian iha Timor-Leste, liuhosi infraestrutura públiku ne’ebé asesivél, sistema informasaun ne’ebé inkluzivu integradu no asesivél. Tenke iha fasilidade no ekipamentu ne’ebé adekuadu hodi fasilita no responde ba nesesidade tipu defisiénsia oioin ne’ebé Timor-Leste iha, liu-liu iha eskola, iha ospitál nomós iha fatin públiku sira hotu,” Portavóz Bruno Soares Saldanha hateten liuhosi konferénsia imprensa ne’ebé hala’o iha edifísiu OXFAM Hudi Laran, segunda ne’e.

Tuir nia, ida-ne’e bele garante katak ema ho defisiénsia mós goja sira-nia direitu no sente duni independénsia ida-ne’e lori mudansa ne’ebé signifikante ba ema hotu no la husik duni ema ida iha kotuk.

“Ema ho defisiénsia sira mós bele goza sira-nia moris ho livre no independentemente,” nia dehan.

Tanba, nia dehan, ema ho defisiénsia barak mak mukit liu tanba dalabarak sira labele hetan mós oportunidade di’ak hanesan ema seluk, nune’e kondisaun ne’ebé suportavél mós sai nu’udar sira-nia ezijénsia atu hadi’ak liután povu hotu nia moris liu-liu ema ho defisiénsia sira.

“Dala barak ema ho defisiénsia sira-ne’e kontinua tama iha kategoria ema-ne’ebé ki’ak no marjinalizadu liu iha sosiedade sira-nia leet. Aleinde ne’e, ema ho defisiénsia sira mós hasoru diskriminasaun no difikuldade oioin iha sira nia moris,” nia dehan.

Nune’e, iha konferensia imprensa ne’e iha sujestaun lubuk ida-ne’ebé nia rekomenda atu Governu bele ajuda halo di’ak situasaun no kondisaun hotu ba ema ho defisiénsia, tanba sira mós hola parte nu’udar povu iha sira-nia rain rasik.

Rekomendasaun sira-ne’e mak oinsá tulun ema ho defisiénsia sira iha prosesu juridíku, oinsá tulun ema ho defisiénsia sira bele asesu ba ekipamentu sira-ne’ebé hafasil sira ka ajuda sira ho limitasaun hotu ne’ebé sira iha, nune’e sira mós sente ukun-an ida-ne’e benefisia mós sira tanba sira bele goja mós direitu hanesan ho ema sira seluk.

Entretantu iha pontu importante lubuk ne’ebé sira hato’o atu Governu bele hamri’ik ho ema defisiénsia sira hodi konstrui situasaun no kondisaun ne’ebé dignu mós ba sira.

“Husu Governu hodi aloka Orsamentu Jerál Estadu ne’ebé espesífiku ba Ministériu Edukasaun Juventude no Desportu (MEJD) hodi bele responde ba nesesidade ema ho defisiénsia sira-nian, atu hola materiál no ekipamentu sira-ne’ebé bele fasilita estudante no manorin sira iha eskola kona-ba oinsá halo interpretasaun ba lian jestuál no mós letra braille nian. Husu Governu liu-liu MEJD atu aloka orsamentu ne’ebé adekuadu no implementa programa ezame ekivalénsia nu’udár aproximasaun integradu iha eskola ba estudante sira iha nivel sekundáriu iha Timor-Leste,” nia dehan.

Nune’e, husu ba Ministériu Justisa hodi aloka orsamentu espesífiku atu bele fó asisténsia no fasilita ema ho defisiénsia sira iha setór justisa.

Aleinde ne’e, hasa’e abilidade advogadu/a, prokuradór/a no juíz sira, nune’e bele halo interpretasaun ba lian jestuál no mós ba psiko-sosiál sira hosi ema ho defisiensia durante prosesu justisa nian.

Governu liu-liu Ministériu Obras Públiku (MOP) atu kontinua tau orsamentu ne’ebé adekuadu no mós asegura katak kualkér planeamentu infrastrutura sira tenke dezeña tuir padraun universál ba ema ho defisiénsia sira-nian hodi fó prioridade ba asesibilidade no kontinua garante katak ema ho defisiénsia sira bele asesu ho fasil no di’akliu.

Husu Ministériu Saúde no Ministériu Solidariedade Sosial no Inkluzaun atu estabelese sentru atendementu integradu ba ema ho defisiénsia psiko-sosiál ka saúde mentál sira iha Timor-Leste.

Tuir dadús 2015, ema ho defisiénsia iha Timor-Leste totál mane hamutuk 20,140 no feto hamutuk 17, 978.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!