DILI, 21 novembru 2023 (TATOLI)—Parlamentu Nasionál (PN), segunda ne’e, liuhosi reuniaun plenária aprova pedidu no autoriza Prezidente Repúblika (PR), José Ramos Horta, atu ba vizita Singapura.
‘’Rezultadu votasaun a-favór 56, kontra 0 no abstensaun 0. Nune’e rezolusaun Parlamentu Nasionál nian sobre dezlokasaun Prezidente Repúblika ba repúblika Singapura nian aprovadu,” , Vise Prezidente Parlamentu Nasionál, Maria Angelina Sarmento, hateten iha sala plenária, PN.
Pedidu Xefe Estadu nian hodi hala’o vizita Estadu ba Repúblika Singapura iha loron 06 fulan-dezembru 2022.
Tuir termu efeitu númeru 1 artigu 80, no alínea ‘h’ númeru 3 artigu 95 Konstituisaun Repúblika Demokrátika Timor-Leste (KRDTL) meiu ne’e PR solisita ba PN hodi fó konsetimentu dezlokasaun Xefe Estadu nian hala’o vizita Estadu.
Antes ne’e, PN autoriza ona PR hala’o vizita Estadu ba Indonézia, Austrália, partisipa sesaun ba dala-77 asembleia jerál Organizasaun Nasaun Unida (ONU) iha Nova Iorke- Estadu Unidu Amérika (EUA) ba Reinu Kambodia, Portugál.
Jornalista : Nelson de Sousa
Editór : Cancio Ximenes
