COVALIMA, 21 novembru 2022 (TATOLI)–Prezidente Konsellu Veteranu Munisípiu Covalima, Osório Soares “Mausoko”, informa veteranu munisípiu Covalima na’in-20 sei simu kondekorasaun ba ordem rua (2) iha ámbitu komemorasaun loron proklamasaun independénsia ba da-47 (28 novembru 1975-28 novembru 2022).
Governu sei kondekora veteranu na’in-20 iha Covalima ho medalla ordem Nicolau Lobato no ordem Gerillia.
“Iha ámbitu komemora loron proklamasaun independénsia Timor-Leste, veteranu Covalima na’in-20 sei simu kondekorasaun medalla ordem rua iha Covalima,” Osório Soares Mausoko hato’o ba jornalista sira, iha-nia kna’ar fatin, Tabakolot, segunda ne’e.
Iha komemorasaun ne’e, medalla ba veteranu sira-ne’e sei atribui hosi vise primeiru-ministru, konsellu veteranu no administradór munisípiu Covalima.
Kondekorasaun veteranu na’in-20 ne’e mai husi postu administrativu sira hanesan postu administrativu Fohorem na’in-haat (4) mak simu medalla ordem Nikolau Lobatu no na’in-ida (1) medalla ordem Gerilla.
Veteranu hosi postu administrativu Suai hamutuk na’in-neen (6) ho medalla ordem Nicolau Lobato, hosi Maucatar veteranu na’in-lima (5) simu medalla ordem Nicolau Lobatu, postu Fatumea na’in-tolu (3) sei simu medalla ordem Nikolau Lobatu no postu Fatululik na’in-rua (2) mak sei simu ordem Nikocau Lobato.
Jornalista : Celestina Teles
Editór : Cancio Ximenes
