COVALIMA, 22 novembru 2022 (TATOLI)—Autoridade munisipál Covalima, segunda ne’e, hahú loke feira kulinér no jogu bola guling (BG) iha kampu ladi hodi komemora loron proklamasaun independénsia 28 novembru Timor-Leste ba dala-47.
“Ita iha atividade lubuk-ida hodi komemora 28 novembru, primeiru ita loke feira mak ita hamutuk iha ne’e. Tanba ne’e, ita mai hamutuk iha ne’e hodi halo abertura ba feira hanesan ita-nia inan sira halo atividade tein hahan produtu lokál no loke atividade bola guling,” Reprezentante administradór munisípiu Covalima, Francisco de Jesus Alves, hateten ba jornalista sira, iha kampu Ladi, Covalima.
Komisaun organizadora loke feira kulinária hosi grupu feto sira hodi tein produtu lokál, nune’e bele sosa sira-nian hodi bele hetan rendimentu no mós loke jogu bola guling hodi anima komunidade Covalima.
Autoridade Covalima ne’e dehan, maske hetan krítika banhira loke feira iha mós atividade bola guling fó impaktu negative maibé bazea ba esperiénsia iha tinan 2018 loke feira foku ba faan sasán de’it ne’e komunidade sei la partisipa.
Bazea ba esperiénsia ne’ebé hatudu loke atividade feira kulinária tenke loke mós atividade jogu bola guling, nune’e komunidade mós bele partisipa másimu.
Iha ámbitu komemorasaun 28 novembru ne’e realiza atividade jogu bola guling la’ós loke de’it maibé sira mós selu taxa ba Estadu, tanba foin lalais inspetór traballu do jogo informa katak Covalima kontribui taxa makaas liu-hosi atividade jogu.
“Loke Atividade bola guling sira la’ós loke de’it maibé selu taxa ba Governu hodi bele halo dezenvolvimentu. Tanba, foin lalais ha’u hasoru inspetór trabalu jogu informa katak Covalima kontribui taxa makaas liuhosi atividade jogu. Tanba loke atividade jogu, ema la obriga ita atu joga,” nia hateten.
Jornalista : Celestina Teles
Editór : Cancio Ximenes
