iklan

DILI, POLÍTIKA, SAÚDE, Uncategorized

Deputada CNRT-FRETILIN husu MS aselera estabelese unidade kardiolojia

Deputada CNRT-FRETILIN husu MS aselera estabelese unidade kardiolojia

Deputada CNRT, Lúcia Taeki. Imajen Tatoli/Francisco Sony.

DILI, 22 novembru 2023 (TATOLI)—Deputada hosi bankada Congresso Nacional de Reconstrução Timorense (CNRT), Lúcia Taeki, husu Ministériu Saúde (MS) atu aselera estabelese unidade kardiolojia hodi fó atendimentu ba pasiente sira iha rai-laran.

“Ita hatene, ita seidauk iha klínika kardiolojia iha rai-laran. Agora daudaun ita iha ona ekipamentu husu Ministériu Saúde atu trata lalais klínika ida-ne’e liga mós ho rekursu,”  Deputada CNRT ne’e hateten iha Parlamentu Nasionál, tersa ne’e.

Nune’e, tenke eleva rekursu umanu oinsá fó bolsu estudu ba médiku sira hodi ba hasa’e kursu espesialista atu fó atendimentu ba moras kardiovaskulár iha Timor-Leste.

Deputada menbru Komisaun F trata asuntu saúde ne’e konsidera importante aselera estabelese sentru kardiovaskolár redus despeza transfere pasiente ba rai-li’ur no mós lori besik atendimentu ba povu iha rai-laran.

“Ami komisaun mós tau importante no husu nafatin Governu tau orsamentu atu harii duni fatin klínika fuan, ita hakarak tau iha ita-nia nasaun liga ba ita-nia moras agora kontinua transfere ba li’ur,” nia hateten.

Deputada bankada Fretilin, Elena Martins, dehan daudaun ne’e MS iha ona ekipamentu atu estabelese sentru kardiolojia espera bele aselera prosesu.

“Ida-ne’e iha ona faze finál ona karik iha ospitál António Carvalho (Lahane), ami kuandu ba iha Malázia ekipamentu balun iha ne’e tiha ona agora hein de’it sira kompleta tan edifísiu kuartu balun ne’e,” nia hateten.

Ministra Saúde rasik hato’o probabilidade tinan ne’e atendimentu moras fuan iha ne’e lori espesialista sira hosi li’ur mai evita ita halo transferénsia moras ba li’ur.

“Kona-ba rekursu umanu hanoin orsamentu foin lalais tau iha Fundu Kapitál Dezenvolvimentu (FDCH) akomoda,” nia dehan.

Notísia Relevante: https://tatoli.tl/2022/10/04/komisaun-f-rekomenda-ba-ms-aselera-estabelese-unidade-kardiolojia/

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!