DILI, 22 novembru 2022 (TATOLI)–Institutu Nasionál Saúde (INS), tersa ne’e, realiza konferénsia internasionál daruak, ne’ebé hanesan atividade anuál ho tema: ‘haforsa sistema diagnóstika no kontrola ba moras hada’et iha Timor-Leste.’
“Atividade oinoin ne’ebé ita halo iha loron ida-ne’e hanesan prova katak importante tebes atu fó importánsia ba moras hada’et sira. Ita hato’o apresiasaun boot ba komisaun ne’ebé realiza atividade ne’e, bainhira mundu sei esforsu hodi rekupera esperiénsia nakukun ba impaktu pandemia COVID-19,” Ministra Saúde, Odete Maria Freitas Belo, hateten, liuhosi ninia diskursu iha ámbitu konferénsia da ruak ne’ebé realiza iha Sentru Konvensaun Dili (CCD, sigla portugés).
Atividade ne’e hala’o durante loron-rua, hahú hosi loron 22 to’o 23 novembru, ne’ebé partisipa hosi parseru dezenvolvimentu sira ne’ebé trata asuntu saúde, hanesan Organizasaun Mundiál Saúde (OMS), Menzies TL, UKaid, no Maluk Timor.
Tuir governante ne’e, atendimentu ba moras hada’et ne’ebé mosu sai hanesan ajenda saúde globál no Timor-Leste, nune’e tenke aproveita esperiénsia ne’ebé hasoru durante COVID-19 hodi reforsa kapasidade servisu saúde nasionál.
Notísia relevante: INS ho NGO Maluk Timor Lansa Programa Aplikasaun Haroman ba Moras Hada’et
Ministra Saúde husu tau-atensaun efetivu ba nesesidade saúde daudaun ne’e no iha tempu hanesan bele hasa’e kapasidade sistema saúde hodi bele hasoru situasaun ambiente no emerjénsia saúde komunidade iha futuru.
Iha biban hanesan, Diretora Jerál INS, Domingas da Costa Pereira, hateten, konferénsia sientífika ne’e hanesan eventu importante atu matenek na’in sira hato’o esperiénsia, koñesimentu no rezultadu peskiza ba problema ne’ebé konsege identifika liuhosi peskiza sira
“Peskiza iha saúde no kontrola moras infesioza sira hanesan mós prioridade VIII Governu Konstitusionál tuir mandatu INS ba funsionamentu liuhosi departamentu peskiza atu kompriende dezenvolvimentu no asaun ne’ebé kontribui ba estudu tékniku no métodu hodi bele rekomenda ba prestasaun servisu saúde,” nia akresenta.
Iha parte seluk, sientista sira mós esforsu halo nafatin estudu kona-ba haforsa sistema diagnóstiku, kontrola infesaun, no rekomenda medida relevante ba rezultadu peskiza inklui kna’ar na’in sira iha Ministériu Saúde atu halo planu adekuadu. Nune’e liuhosi kooperasaun ho parseiru dezenvolvimentu sira hanesan organizasaun OMS, Menzies TL, Maluk Timor bele realiza konferénsia sientífika ida atubele hato’o rezultadu estudu ne’ebé peskizadór hala’o ona.
“Sientífika sira sei aprezenta temátika haat hanesan saúde públika, klinikál, laboratóriu no saúde ida. Rezultadu hosi aprezentasaun sira sei rekomenda ba kna’ar na’in sira no Minstériu Saúde atu foti medida intervensaun importante,” nia tenik.
Nune’e mós, Responsável Menzies TL, Jennifer Yan, dehan, Menzies iha priviléjiu halo parseria ho Governu Timor-Leste.
“Relasaun Menzies nian durante tinan tinan 20 ona hodi apoia kapasitasaun, projetu peskiza saúde sira, no ajuda Governu estabelese prosesu peskiza gabinete no komisaun étika. Iha tinan lima ikus ne’e Menzies nia apoiu iha Timor-Leste aumenta ona,” nia informa.
Menzies ninia objetivu mak atu apoia Governu no povu Timor-Leste atu hametin sistema saúde, liu-liu hatan ba moras infesiozu sira no atu hala’o peskiza kona-ba asuntu saúde prioridade sira hodi kria dadus no evidénsia sira ne’ebé bele tulun atu informa polítika saúde no mellora rezultadu saúde sira nian.
“Servisu ne’ebé interesante tebes no fó impaktu. Ami hein katak tuir oráriu konferénsia ne’e nian, ita bele rona peskiza iha ita-nia área no apreende kona-ba peskiza ne’ebé hala’o hela iha Timor-Leste iha área sira seluk, no koñese ita-nia kolega sira iha área peskiza sira seluk. Menzies kompromete ona atu serbisu hamutuk no kontinua fó apoiu ba ita-nia kolega timor-oan sira no Governu Timor-Leste iha future,” Responsável ne’e argumenta.
Mezies planu atu kontinua fó apoiu iha área reforsa laboratóriu no rezisténsia antimikrobiu, dengue, malária, HIV no TB, leprosia, brucellosis nian. Objetivu prinsipál ida hosi Menzies nia servisu mak atu apoia dadus no evidénsia ba pergunta saúde importante balun ba Timor-Leste.
Objetivu prinsipál seluk hosi Menzies nia servisu mak atu servisu hamutuk iha orientasaun no dezenvolve abilidade no kapasidade ema sira ne’ebé servisu hamutuk hodi fahe vizaun individuál sira nu’udar líder iha Timor-Leste iha sira-nia área no sai mentór ba ema seluk ne’ebé dezenvolve iha sira-nia okos iha siénsia laboratóriu, farmásia, klínika, medisina veterinaria, vijilánsia, no peskizadór sira.
“Hau sei fahe informasaun barak liután kona-ba aprosimasaun mentoria ne’e iha sesaun plenária ohin loron nian,” nia salienta.
Atividade ne’e realiza ho parseiru dezenvolvimentu sira ne’ebé halo aprezentasaun rezultadu peskiza liuhosi stand ida-idak ne’ebé tau iha salaun CCD laran.
Jornalista : Antónia Gusmão
Editora : Julia Chatarina
