DILI, 22 novembru 2022 (TATOLI)— Juiz Administradór Tribunál Distritál Dili (TDD), Afonso Carmona, hateten, tinan ne’e tribunál movél la halao tanba problema orsamentu ba kustu konbustivél laiha.
“Durante ne’e tribunál movél lao hela maibé tinan ida ne’e laiha, tanba ita nia orsamentu ba konbustivél laiha,” Juiz Administradór Tribunál Distritál Dili (TDD), Afonso Carmona dehan ba jornalista sira iha TDD, tersa ne’e.
Nia esplika, konbustivél ba Juiz sira ne’e hosi Tribunál Rekursu fó tinan ida, maibé konbustivél ba Tribunál Movél laiha.
“Konbustivél ba Juiz ne’e uza hosi uma to’o mai fatin servisu de’it. Maibé laiha konbustivél ba Tribunál Movél. Durante ne’e ha’u uza ha’u nia mina hodi halo julgamentu movél to’o mina hotu, atu re-bolsa fali maibe tenke halo pedidu ba Tribunál Rekursu. Maibé provizoriu atividade ne’e laiha tanba problema mina ba atividade Tribunál Movél tinan ne’e laiha,” afirma Juiz Administradór Afonso Carmona.
Nia espera tinan oin Tribunál Rekursu tau ona ba kestaun mina nune’e funsionamentu Tribunál Movél bele efetivu fali.
“Espera tinan oin Tribunál Rekursu bele haree hodi rezolve kestaun sira ne’e. Tanba Tribunál Movél ne’e nia ejistensia atu lori justisa besik liu ita nia sidadaun vuneravél sira no razaun seluk maka atu reduz kazu sira,” katak Juiz Administradór Dili ne’e.
Jornalista: Natalino Costa
Editora : Armandina Moniz
