iklan

BAUCAU, HEADLINE, MUNISÍPIU, POLÍTIKA

MNEK sensibiliza polítika externa Timor-Leste nian ba Autoridade Baucau

MNEK sensibiliza polítika externa Timor-Leste nian ba Autoridade Baucau

Ministériu Negósiu Estranjeiru no Kooperasaun, tersa ne’e sensibiliza polítika externa Timor-Leste nian ba autoridade lokál iha munisípiu Baucau. Imajen Tatoli/Natalino Belo.

BAUCAU, 22 novembru 2022 (TATOLI) – Governu liuhosi Ministériu Negósiu Estranjeiru no Koorperasaun (MNEK) tersa ne’e, sensibiliza polítika externa Timor-Leste nian ba autoridade lókal iha munisípiu Baucau.

Vise MNEK, Julião da Silva, esplika, kuaze komunidade klase mÉdiu ba leten de’it mak hatene no iha informasaun natoon maibé komunidade no autoridade barak iha baze mak seidauk asesu kona-ba serbisu relasaun bilaterál ne’ebé MNEK halo hafoin Timor-Leste restaura independénsia iha tinan 2002.

“Komunidade no autoridade sira tenke hatene no komprende nune’e bele Envolve iha prosesu hotu, ami  hanoin katak lori programa hanaran MNEK ba povu hodi sosializa (sensibiliza) ita-nia relasaun bilaterál to’o iha ne’ebé ho país saida de’it, organizasaun internasionál ne’ebé mak ita adere ona,” Vise Ministru Negósiu Estranjeiru no Kooperasaun hateten iha Sentru Konvensaun Baucau (CCB, sigla portugés), iha Vila Antiga, tersa ne’e.

Rezultadu serbisu ne’ebé MNEK halo hanesan prezensa ajénsia internasionál implementa programa dezenvolvimentu iha suku no aldeia, situasaun ne’e mosu tanba esforsu ka rezultadu servisu negosiasaun hosi MNEK liuliu influénsia organizasaun internasionál sira hodi halo investe iha Timor-Leste.

Relasaun bilaterál importante tanba hanesan nasaun ida iha mundu tenke iha polítika externa ne’ebé forte hodi hametin relasaun ne’ebé armónia ho nasaun seluk hanesan komparasaun ho sosiedade iha uma-laran ba bairru no relasaun entre viziñu.

“Komprende de’it sei la sufisiente tenke envolve atu kontribui, relasaun bilaterál la’ós iha MNEK nia liman de’it, maibé iha povu hotu-nia liman hanesan kontribui ba pás no estabilidade bainhira iha turista ruma vizita fatin turismu iha Timor-Leste,” Julião akresenta.

Timor-Leste rasik hahú sai membru permanente iha organizasaun Nasaoens Unidu (ONU) iha fulan-setembru 2002 ho misaun importante hanesan promove pás no dame iha mundu, envolve mós iha CPLP iha tinan 2022 no organizasaun Uniaun Europeia hodi halo kooperasaun polítika, dezenvolvimentu no komersiál hosi tinan 2005.

Nune’e mós instala akreditasaun embaixada hodi halo misaun bilaterál iha nasaun hamutuk 30 inklui konsuladu hanesan Atambua, Kupaun no Bali, Indonézia no Austrália iha Darwin no Sidney.

Atividade sensibilizasaun hetan partisipasaun ho Prezidente Autoridade Munisípiu (PAM) Baucau, Olivio ‘Bou-Lesa’ Freitas, Autoridade Suku, Organizasaun Juventude inklui Sosiedade Sivil munisípiu Baucau.

Papél MNEK nian

Ministériu Negósiu Estranjeiru no Kooperasaun maka departamentu governamentál ne’ebé responsável ba konsesaun, ezekusaun, koordenasaun no avaliasaun polítika nian, ne’ebé define no aprova hosi Konsellu Ministru, ba área polítika esterna no kooperasaun internasionál, ba funsaun konsulár sira, promosaun no defeza ba interese sidadaun timoroan sira iha rai-li’ur.

Ministériu Finansa mak iha responsabilidade liuliu, atu planifika, propoin no ezekuta polítika esterna Timor-Leste nian no atu garante ninia unidade no koerénsia, atu elabora projetu lejizlativu no regulamentasaun sira iha área idak-idak ne’ebé tutela, atu negósia no propoin selebrasaun tratadu no akordu internasionál sira, tuir prioridade polítika esterna Timor-Leste nian, sein prejuízu ba kompeténsia rasik órgaun sira seluk kona-ba delimitasaun fronteira nian.

Nune’e mós atu promove interese sira Timor-Leste nian iha rai-li’ur no asegura protesaun ba sidadaun timoroan sira iha rai-li’ur, atu asegura reprezentasaun Timor-Leste nian iha Estadu no organizasaun internasionál sira seluk, no atu jere rede embaixada, misaun, reprezentasaun permanente no temporária no postu konsulár sira, tuir prioridade polítika esterna nian sira.

MNEK mak planeia no ezekuta preparasaun ba adezaun Timor-Leste nian ba Organizasaun Nasaun Sudeste Aziátiku (ASEAN, sigla inglés) no asegura reprezentasaun nasaun ne’e iha sorumutuk no atividade idak-idak, atu koordena partisipasaun Timor-Leste nian hamutuk ho Komunidade Nasaun sira Lian Portugés nian (CPLP, sigla portugés) no atu asegura reprezentasaun nasaun ne’e iha sorumutuk no atividade ida-idak; atu sentraliza no koordena relasaun husi entidade públika saída de’it ho misaun diplomátika ka konsulár, ho organizasaun internasionál sira no ho reprezentasaun servisu kooperasaun internasionál ne’ebé iha reprezentasaun iha Timor-Leste.

MNEK mak propoin no ezekuta polítika kona-ba kooperasaun internasionál, iha koordenasaun ho Ministériu Finansa no instituisaun governamentál kompetente sira seluk, atu koordena relasaun Timor-Leste ho parseiru sira dezenvolvimentu nian, hamutuk ho Ministériu Finansa no departamentu kompetente Governu nian sira seluk.

MNEK mós ezerse funsaun sira-ne’ebé ministériu ne’e hetan fiar iha asuntu diplomasia ekonómika, ezerse funsaun sira hanesan ordenadór nasionál, estabelese mekanizmu kooperasaun sira ho misaun estranjeira sira-ne’ebé estabelese ona iha país, estabelese mekanizmu kolaborasaun no koordenasaun ho órgaun Governu nian sira seluk ne’ebé tutela ba área sira atividade nian ne’ebé iha koneksaun.

MNEK mak organiza, dinamiza ka partisipa iha tipu atividade saida de’it ne’ebé nesesária ba estabelesimentu no funsionamentu husi plataforma ida ba kooperasaun no dezenvolvimentu ekonómiku integradu sub-rejionál entre Timor-Leste, Indonézia no Austrália.

Jornalista    : Natalino Belo

Editór           : Evaristo Soares Martins

iklan
iklan

Leave a Reply

iklan
error: Content is protected !!