iklan

NASIONÁL, HEADLINE, KAPITÁL

MOP enserra formasaun kona-ba protesaun kosteira drenajen

MOP enserra formasaun kona-ba protesaun kosteira drenajen

Diretór Jerál MOP, Rui Hernani. Imajen Tatoli/Francisco Sony

DILI, 22 novembru 2022 (TATOLI)—Ministériu Obra Públika (MOP), tersa ne’e, halo enserramentu atividade formasaun kona-ba matéria rekursu ídriku, protesaun kosteira no drenajen.

Diretór Jerál MOP, Rui Hernani, hateten, formasaun ne’e hala’o tanba iha tinan-rua liubá MOP halo kooperasaun ho Komunidade País ho Lian Portugés (CPLP, siga portugés), ho patrisíniu hosi Instituto Camões, Portugal, tanba ne’e ninia rezultadu mak agora implementa.

“Objetivu prinsipál hosi formasaun mak prepara rekursu umanu no kondisaun di’ak atu atende situasaun rai-laran, bainhira ita presiza dezeñu ruma ita uza ema de’it, tanba ne’e iha formasaun ne’e apreende buat barak, liu-liu estrutura bee,” Diretór Jerál, dehan iha Restaurante El-Legendário, iha Otél Novo Turismo.

Notísia relevante: SEA Halo Alerta Ba Protesaun ‘Dugong ho Du’ut Tasi’

Formandu ne’ebé partisipa iha formasaun hamutuk 60, maihosi universidade privadu no instituisaun sira ne’ebé iha relasaun ho enjeñaria.

“Partisipante sira-nia prezensa iha formasaun ne’e importante tebes tanba bele apreende matéria rekursu ídriku, protesaun kosteira no drenajen. Ida-ne’e importante tanba kona-ba Timor-Leste nia sofrementu tanba impaktu inundasaun. Nune’e ita-nia enjeñeiru foin-sa’e sira bele apreende no aproveita di’ak hodi minimiza risku sira ne’ebé akontese,” nia akresenta.

Iha fatin hanesan, Formandu no Reprezentante enjeñaria hosi munisípiu Lautém, Marlina Octávia Pereira, agradese ba Governu ne’ebé halo kooperasaun ho Instituto Camões ne’ebé bele oferese formasaun.

“Ida-ne’e matéria importante tebes tanba bele aumenta abilidade no relevante ba tékniku tanba iha formasaun ne’e apreende oinsá bele halo protesaun ba mota no tasi bainhira mosu inundasaun,” nia tenik.

Formasaun ne’e realiza durante semana ida, hahú loron 15 to’o 22 novembru.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!