iklan

JUSTISA

MP realiza konferensia internasionál loron rua, julgamentu iha TDD paradu 

MP realiza konferensia internasionál loron rua, julgamentu iha TDD paradu 

Juiz Administradór TDD, Afonso Carmona. Imajen Tatoli/Dok.

DILI, 22 novembru 2022 (TATOLI)— Funsionamentu proses julgamentu iha Tribunál Distritál Dili (TDD) durante loron rua paradu, tanba partisipasaun Ministeriu Públiku (MP) iha  konferénsia internasionál kona-ba rekuperasaun ativu no kombate korrupsaun liu husi krime konexu.

Konferénsia internasionál kona-ba rekuperasaun ativu no kombate korrupsaun liu husi krime konexu, ne’ebé realiza husi Prokuradór Jerál Repúblika (PGR) iha Timor Plaza, Suai Room durante loron rua (21-22 novembru 2022).

Juiz Administradór Tribunál Distritál Dili (TDD), Afonso Carmona, hateten funsionamentu  TDD durante loron rua ne’e  la  realiza audensia julgamentu ba kazu  ne’ebé iha ona ajenda, tanba partisipasaun Ministeriu Públiku iha konferensia refere.

“Durante ne’e TDD  sempre funsiona ho di’ak iha situasaun saida de’it, maibé  liga ba loron horseik no ohin, Tribunál nian atividade paradu uituan, tanba  MP sira la mai partisipa iha audensia julgamentu, tanba partisipa hela iha konferensia refere,” Juiz Administradór   Afonso Carmona, dehan  jornalista sira iha TDD, tersa ne’e.

“Realizasaun  atividade ne’e rasik, Ministeriu Públiku iha koñesimentu liu hosi  karta mai Tribunál, katak durante loron Ministeriu Públiku sei halo atividade,” Juiz Administradór   Afonso Carmona afirma.

Entertantu Prokuradoria Gerál Repúblika (PJR) serbisu hamutuk ho parseria UNODC no Ministériu Justisa Repúblika Korea realiza konferénsia Internasionál kona-ba rekuperasaun ativu no kombate korrupsaun liu husi krime konexu.

Jornalista: Natalino Costa

Editora    : Armandina Moniz

iklan
iklan

Leave a Reply

iklan
error: Content is protected !!