BAUCAU, 22 novembru 2022 (TATOLI) – Uma-kain hamutuk 331 hosi suku Laisorulai de Cima, postu administrativu Quelicai, munisípiu Baucau sei sai benefisiáiru subsídiu $200 ihia tinan 2022.
Xefe suku Laisorulai de Cima, Cipriano Cabrál, esplika, dadus refere rekolla hosi pandemia covid-19 ne’ebé akontese iha tinan 2021 no submete ona autoridade munisípiu Baucau.
“Agradese ba governu, subsídiu ne’e importante ba povu tanba foin dahuluk akontese iha Timor-Leste,” Xefe suku Laisorulai de Cima hateten iha Sentru Konvensaun Baucau (CCB, sigla portugés), tersa ne’e.
Cipriano Cabral lamenta ho desizaun governu atu fó mós subsídiu ba funsionáriu publiku ne’ebé kada tinan hetan ona saláriu terseiru désimu no nafatin hetan subsídiu $200 iha fin do ano nune’e posibilidade sei mosu dezintendimentu entre komunidade bainbain ho funsionáriu públiku sira.
“Husu ba governu atu hadia tiha, sé lae ita estraga osan de’it,” Cipriano Cabral akresenta.
Autoridade suku Laisorulai rejista tótal populasaun 1.264 komposta aldeia tolu hanesan aldeia Uaidaba, Batecasa no Uataliu.
Ministériu Administrasaun Estatál (MAE) submete ona dadus hamutuk 39.000 ba Ministéiru Solidariedade Soisal no Inkluzaun (MSSI) ho totál pagamentu hamutuk millaun $7,8-resin.
Jornalista : Natalino Belo
Editór : Evaristo Soares Martins
