iklan

EKONOMIA, HEADLINE

Empreza 22 sai manán-na’in ba programa kréditu suave hosi MTKI

Empreza 22 sai manán-na’in ba programa kréditu suave hosi MTKI

Vise-Ministru Turizmu Komérsiu no Indústria, Domingos Lopes Antunes. Imajen Tatoli/Francisco Sony

DILI, 23 novembru 2022 (TATOLI)—Empreza lokál hamutuk 22 sai manán-na’in asesu programa kréditu suave, ne’ebé introdús ona hosi Ministériu Turizmu Komérsiu no Indústria (MTKI).

“Ita simu proposta tinan ne’e, ba ema sira ne’ebé atu aplika ba kréditu suave ne’e hamutuk 50, ikus mai empreza na’in-22 mak sai manán-na’in ba programa kréditu suave, ho totál orsamentu $339.328,” Vise-Ministru Turizmu, Komérsiu no Indústria, Domingos Lopes Antunes, hateten ba Agência Tatoli, iha ninia knar fatin, Bebora, kuarta ne’e.

Emprezáriu manán-na’in kompostu hosi ualu ho totál orsamentu $101.658 no mane 14 ho totál orsamentu $237.670.

Maioria manán-na’in sira halo atividade iha área indústria, agrikultura, turizmu no komérsiu.

Notísia relevante: Empreza 11 submete aplikasaun kréditu suave ba MTKI

Programa kréditu suave ne’e rasik hahú lansa iha tinan 2020 no implementa iha tinan 2021.

“Ita konta hahú hosi lansamentu to’o mai agora aplikante sira ne’ebé aplika ne’e maihosi territóriu Timor laran tomak hamutuk 113, ne’ebé hosi númeru ne’e iha na’in-37 mak aprovadu hosi Banku Nasionál Komérsiu Timor-Leste (BNCTL, sigla portugés) ho nia totál orsamentu $569.409, no sei iha empreza ualu nia dokumentu mak sei iha banku hela ho nia totál orsamentu $172.527, ne’ebé ita konta ne’e iha aplikante 45 mak iha banku nia liman,” nia akresenta.

Antes ne’e, Konsellu Ministru autoriza halo despeza bazeia ba kontratu depózitu selebradu ida ho BNCTL ba implementasaun liña kréditu fasilidade garantia kréditu suave.

Deliberasaun ne’e sei autoriza transferénsia millaun $50 hosi konta tezouru ba konta bankária ne’ebé loke bazeia ba kontratu ne’e.

Liña kréditu ne’e ho objetivu atu estabelese garantia kréditu ida kona-ba kréditu ne’ebé sei fó hosi instituisaun bankária ba empreza mikro, kiik, média no boot, ho objetivu fix taxa juru remuneratóriu ne’ebé permite hadi’a kondisaun asesu ba kréditu hosi parte empreza ne’ebé opera iha merkadu nasionál.

Liña kréditu ida-ne’e finansia hosi dotasaun millaun $50, ne’ebé inskrita ona iha Orsamentu Jerál Estadu (OJE) tinan 2022.

Liuhosi kréditu suave, benefisiáriu bele halo kréditu iha banku hahú $1.000 to’o 25.000, ho juru 3% kada tinan.

Kritériu atu sai benefisiáriu ba programa ne’e maka tenke rejistradu hanesan entidade formál ida iha Servisu Rejistrasaun no Verifikasaun Emprezariál Instututu Públiku (SERVE) no tenke iha planu negósiu, iha kartaun eleitorál, billete identidade no seluk tan.

Komisaun responsável ba programa fasilidade garantia kréditu suave ne’ebé sei halo avaliasaun no verifikasaun prosesu asesu kréditu mak MTKI, BNCTL, Kámara Komérsiu Indústria Timor-Leste (CCI-TL, sigla portugés) no Institutu Apoiu Dezenvolvimentu Emprezariál (IADE).

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!