iklan

COVALIMA, POLÍTIKA

Jestaun risku dezastre naturál Covalima identifika suku 14 afetadu inundasaun

Jestaun risku dezastre naturál Covalima identifika suku 14 afetadu inundasaun

Diretòr Servisu Munisípal Protesaun Sivil Jestaun Dezastre Naturàl, Quintino da Costa. Imajen Tatoli/Celestina Teles.

COVALIMA, 23 novembru 2022 (TATOLI)—Servisu munisipál jestaun risku dezastre naturál Covalima identifika komunidade suku 14 afetadu ba inundasaun.

“Ita-nia meta anuál ita identifika suku 14 sai suku alvu bainhira iha tempu udan sempre akontese inundasaun, rai halai, anin sobu uma. Ho nune’e, ita estabelese ona komisaun jestaun risku dezastre naturál suku ne’ebé ita estabelese ona iha suku hitu,” Diretór Servisu Munisipál Jestaun Risku dezastre naturál, Quintino da Costa, hateten ba jornalista sira, iha bairru Costa, kuarta ne’e.

Tanba ne’e, servisu munisipál mós fahe informasaun ba líder komunitária sira no komunidade bainhira tempu udan makaas, komunidade iha ona preparasaun mak hanesan bainhira akontese inundasaun taka eletrisidade no prepara hahan maran.

“Ita-nia preparasaun ita halo prevensaun fahe informasaun autoridade lokál inan-aman konsellu suku sira halo preparasaun bainhira udan akontese makaas hodi rezulta komunidade nia hela fatin, entaun komunidade halo preparasaun di’ak,” nia informa.

Tanba bazea ba esperiénsia bainhira iha tempu udan kada tinan, komunidade sira iha munisípiu Covalima sempre afetadu ba inundasaun, nune’e halo evakuasau vítima sira ba sentru evakuasaun.

Servisu munisipál estabelese komisaun risku dezastre estabelese ona komisaun iha suku sira hanesan Belecasak, Beco, Holpilat, Beiseuk, Casabauk, Fatumea, Fohorem, Laktos, Fatululik, Taroman, Maudemo, Suai Loro, Ogues no Labarai.

Ho nune’e Servisu dezastre mós husu ba komunidade atu pasa informasaun ba dezastre bainhira akontese inundasaun nune’e bele buka alternativu bainhira komunidade sira labele hela ona iha sira-nia uma, bele evakua ba sentru evakuasaun.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!