iklan

INTERNASIONÁL, DESPORTU, DILI, HEADLINE

Klube Austrália kontrata Nelson Viegas durante tinan ida

Klube Austrália kontrata Nelson Viegas durante tinan ida

Nelson Viegas hetan kontratu hosi klubu terseira divizaun, Asutrália. Imajen espesiál

DILI, 23 novembru 2022 (TATOLI) – Klube terseira divizaun hosi Austrália ho naran Greenvale United kontrata ona jogadór timoroan, Nelson Viegas pozisaun nu’udar defeza durante tinan ida.

Nelson Viegas durante ne’e hanesan joagdór selesaun nasionál seniór.

Bainhira hetan oportunidade ne’e, Nelson simu kedas tanba durante tinan ida ona iha Timor – Leste seidauk realiza liga futeból. Tanba ne’e hanesan jogadór labele para kle’ur demais tenke book-aan hela de’it nune’e prestasaun labele tún.

“Klube terseira divizaun hosi Austráliaa mak selebra ona kontratu ho ha’u, buat hotu loos ona tempu besik sei arranka ba Australia tanba dezembru komesa joga ona iha kopa no tinan oin foin joga liga, buat hotu loos ona, hein ba de’it ona,” Nelson Viegas informa ba Tatoli iha Bebora, Dili, kinta ne’e.

Oportunidade ne’e hanesan mehi ida ba nia nudar jogadór timoroan ne’ebé durante ne’e duni hela mehi harak ba joga iha rai li’ur, ikus sai duni realidade ba nia.

“Primeiru ha’u la haluha agradese ba Aman Maromak ba nia planu ne’ebé  furak iha tinan ida ne mai ha’u, hanesan jogadór ha’u sente orgullu ba ha’u-nia aan tanba bele hetan oportunidade ne’ebé foin primeiravez iha ha’u-nia moris ba joga iha klubu internasionál,” eis jogadór Boavista ne’e akresenta.

Nelson Viegas ho nia moto dehan nune’e “Esforsu sei la mate, esforsu mak lori ita ba oin no esforsu mak dalan ba susesu”.

Nelson Viegas moris iha Dili, 24 dezembru 1999, jogadór ne’e ho nia altura ka aas 1,72m.

Aleinde kontrata Nelson Viegas, klube internasionál ne’e kontrata mós jogadór na’in lima seluk hanesan Paulo Gally Freitas, Armindo Correia, Rofino Gama, Santiago da Costa no António.

Esperiénsia Nelson iha klube antes ne’e no jogu internasionál

Iha tinan 2015 hanesan jogadór iha klube Academi FC, 2016 iha Karketu Dili FC, 2017 Carsae FC, 2018-2020 iha Boavista FC Timor no 2021-2022 Karketu Dili FC.

Aleinde joga iha klube, antes ne’e Nelson mós fó ona nia kontribuisaun ba nasaun Timor – Leste hodi hamutuk ho selesaun nasionál ba joga iha jogu sira internasionál.

Iha 29 maiu 2016 Nelson hamutuk ho selesaun nasionál partisipa jogu Asian Fooball Federation (AFF) iha Kamboja, nafatin iha 2016 jogadór ne’e hamutuk ho selesaun nasionál partisipa jogu play-off kopa Azia kontra Malázia maske Timor – Leste la konsege manán, nafatin iha 2016 Nelson hetan tan oportunidade hamutuk ho selesaun partisipa jogu kualifikasaun ba kopa Ázia kontra Taiwan.

Nafatin iha 2016 Nelson hamutuk ho selesaun nasionál partisipa iha jogu AFF nian iha Kamboja kontra Brunei no iha jogu ne’e Timor – Leste konsege manán.

Iha tinan 2018, jogadór ne’e nafatin hetan konfiansa hosi FFTL hodi partisipa iha jogu play-off AFF nian iha Malázia kontra Brunei Darusalam no ikus Timor – Leste konsege manán hodi ultrapasa ba faze grupu hamutuk ho nasaun Kamboja, Singapura, Tailándia no Filipina maibé iha jogu grupu Timor – Leste la konsege ultrapasa ba semi final no ikus tenke elemina.

Iha tinan 2019 Nelson nafatin hetan konfiansa hosi FFTL reforsa selesaun nasionál senior hodi ba tuir kualifikasaun kopa mundiál 2022 iha Kuala Lumpur, Malázia kontra Malázia iha jogu dala rua la konsege gaña vitória no Timor – Leste la konsege ultrapasa ba oin.

Iha tinan 2021 jogadór ne’e nafatin bolu hosi FFTL hamutuk ho nia belun sira seluk ba compete iha jogu AFF nian no Timor – Leste tama iha grupu A hamutuk ho nasaun sira hanesan Myanmar, Tailándia, Singapura no Filipina to’o ikus Timor – Leste konsege ultrapasa ba semi final kontra Vietname no ikus Timor – Leste hetan de’it terseiru lugár.

Jornalista: Hortencio Sanchez

Editór: Evaristo Soares Martins

iklan
iklan

Leave a Reply

iklan
error: Content is protected !!