DILI, 24 novembru 2022 (TATOLI)—Fakuldade sira iha Universidade Nasionál Timor-Lorosa’e (UNTL) hato’o relatóriu ba jerente sira no propoin kuota estudante hamutuk 3.500 ba tinan akadémiku 2023.
Tuir Vise-Reitór ne’ebé trata asuntu estudantíl no garantia kualidade, Samuel Venâncio de Sousa Freitas, polítikamente kada tinan universidade sempre halo previzaun atu simu estudante foun asesu ba UNTL bazeia ba nesesidade universidade nian, ne’ebé númeru estudante foun rekomenda hosi kada fakuldade, hafoin universidade sei halo rekap hodi submete ba Konsellu Jerál atu divulga no aprezenta ba Ministériu Ensinu Superiór Siénsia no Kultura (MESSK).
“Signifika fakuldade sira mak hatene didi’ak kondisaun iha departamentu inklui kondisaun no nesesidade sala aula, ne’ebé la’ós UNTL mak naran tau de’it númeru sira. Númeru ne’e naton ho saida mak fakuldade husu, agora sei hasoru problema ho sala aula tanba fakuldade sira rekomenda estudante atu tama universidade,” Vise-Reitór informa bainhira partisipa iha serimónia solene lansamentu kursu foun mestradu no doutoramentu iha salaun Katedrál Vila Verde, kinta ne’e.
Notísia relevante: Orientasaun Estudante Foun UNTL Sei Kanaliza Ba Fakuldade Idaidak
Nia dehan, númeru ne’ebé hato’o hanesan previzaun no seidauk fixu, maibé la dook hosi númeru 3.500
“Dadus sira hanesan ne’e bazeia ba esperiénsia universidade nian, dala barak hato’o númeru ida maibé rezultadu ikus mosu fali ho númeru a’as,” nia akresenta.
Tanba ne’e, númeru asesu engeresu estudante foun atu tama UNTL ne’e konsidera fixu ona bainhira Konsellu Jerál UNTL halo ona divulgasaun, hafoin submete ba MESSK hodi hetan konsiderasaun.
Jornalista : Tomé Amado
Editora : Julia Chatarina
