iklan

DESPORTU, DILI, HEADLINE

Filomeno Junior kontinua mantein iha SLB hodi partisipa liga Timorense

Filomeno Junior kontinua mantein iha SLB hodi partisipa liga Timorense

DILI, 24 novembru 2022 (TATOLI) – Kapitaun klube primeira divizaun Liga Futeból Timor-Leste (LFTL) AD SLB Laulara, Filomeno Junior da Costa, hateten durante ne’e klube barak mak kontaktu ona nia, maibé nia deside mantein iha SLB.

“Ha’u sei mantein nafatin ho SLB, tanba tuir informasaun hosi LFTL rasik sei realiza liga iha dezembru nia laran, ne’ebé ha’u mantein ho SLB to’o ne’ebé de’it, klube barak mak kontaktu ha’u mais hau nafatin hili SLB tanba ami sai ona hanesan familia”,  dehan kapitaun selesaun nasionál U-23 no senior ne’e ba Agência TATOLI iha Dili, kinta ne’e.

Nia dehan, maske liga seidauk iha serteza, maibé hanesan jogadór kontinua prepara nia aan liuhosi treinamentu individu kada loron, nune’e prestasaun hanesan atleta kontinua la’o di’ak.

Iha 2016 to’o 2018, SLB nia jogadór barak mak haksoit sai ba klube seluk no sira rasik la lakon vontade ate agora nafatin iha primeira divizaun.

Filomeno joga iha SLB nia pozisaun hanesan defeza sentrál no médiu defensivu ho númeru kamizola 18.

Entretantu, LFTL antes ne’e deklara ona liga sei hala’o iha dezembru nia laran ho sistema ba jogu sei foti metade kompetisaun ho jogu hamutuk 36 ne’ebé sei hala’o de’it iha Estádiu Munisipál Dili to’o ramata.

Alende ne’e, LFTL mós iha komunikasaun di’ak ho klube sira no jogadór ho nune’e iha tempu besik nia garante klube sira ble hakbesik aan ba LFTL hodi halo rezistrasaun jogadór.

Enkuantu kona-ba orsamentu apoiu masimu hosi Governu SEJD ho kontante $200.000, no FFTL $200.000 hamutuk orsamentu $400.000 no kona-ba suporta finanseira ba klube FFTL sei tetu hela.

Total klube primeira divizaun no segunda divizaun ne’ebé hamahan aan iha LFTL hamutuk 18 ne’e mak hanesan primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Atletico Ultramar, Academica FC no Porto Taibessi FC.

Enkuantu, Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!