DILI, 24 novembru 2022 (TATOLI)—Prezidente Konfederasaun Sindikatu Timor-Leste (KSTL), Almerio Vila Nova, lamenta Konsellu Ministru aprova saláriu mínimu $135 tanba la tuir proposta Konsellu Nasionál Traballu nian.
“Saláriu mínimu ne’ebé mak Konsellu Ministru aprova ne’e la tuir proposta tuir Konsellu Nasionál Traballu, tanba governu aprova saláriu mínimu ne’e $135 maibé proposta ne’ebé konsellu nasionál traballu aprezenta iha Ministériu Koordenadór Asuntu Ekonómiku (MKAE), ne’e $150. Ida-ne’e bazea ba peskiza tuir konsellu nasionál traballu kompostu hosi Kámara Komérsiu Indústria Timor-Leste (CCI-TL) ne’ebé prezenta empregadór sira hotu, KSTL rasik ne’ebé reprezenta traballadór hotu-hotu iha Timor-Leste no Governu mak Sekretariu Estadu Formasaun Profesionál no Empregu (SEFOPE),” Prezidente KSTL ne’e dehan ba Agência Tatoli, iha nia kna’ar fatin, kinta ne’e.
Tuir nia, desizaun ida-ne’e halo KSTL l satisfas tanba rezultadu sai mai la tuir proposta ne’ebé mak iha no aat liu mak la liuhosi konsultasaun ho parte tolu ne’e.
“Ami hanesan organizasaun sindikatu lamenta tebes-tebes ho Governu falta konsiderasaun,” nia dehan.
KSTL mós dúvida katak saláriu mínimu bainhira mak implementa tanba iha 2023 ne’e tinan polítika ne’ebé nia mandatu mós la to’o tinan ida tan.
“Tinan oin mak nia konsentra ba kampañia mak kerfizerke sei la serteja. Tanba ne’e mak ha’u dehan atu implementa saláriu mínimu iha sá fulan. Entaun ami sei dúvida ho ida-ne’e,” nia hateten.
Maibé ida-ne’e, nia dehan, sei klarifika ba Governu tanba montante orsamentu la tuir proposta ne’ebé KSTL relata ba Governu.
Jornalista : Osoria Marques
Editór : Cancio Ximenes
