iklan

KAPITÁL, POLÍTIKA

MAPKOMS atribui sertifikadu ba formandu CEFTEC 323

MAPKOMS atribui sertifikadu ba formandu CEFTEC 323

Ministru Asuntu Parlamentár no Komunikasaun Sosiál, Francisco Jerónimo, entrega sertifikadu ba mellor formandu no formanda hosi CEFTEC hosi nivel nasionál to munisípiu ba tinan 2022 nian, iha salaun Delta Nova Dili, kinta (24/11). Imajen Tatoli/Francisco Sony

DILI, 24 novembru 2022 (TATOLI)—Governu liuhosi Ministériu Asuntu Parlamentár no Komunikasaun Sosiál (MAPKOMS, sigla portugés), kinta ne’e, atribui sertifikadu ba formandu Sentru Formasaun Téknika iha Komunikasaun (CEFTEC, sigla portugés) hamutuk 323 iha nível nasionál no munisípiu tinan 2022.

Notísia Relevante: SEKOMS hala’o abertura ba formasaun CEFTEC tinan 2022

“Ha’u hakarak fó parabéns ba formandu sira hotu ne’ebé konklui ona imi-nia formasaun iha CEFTEC, Ha’u hatene katak ita-boot sira sakrifika ita-boot sira-nia tempu hodi mai tuir formasaun, atu nunee bele mós hakarak atu transforma ita-nia sosiedade ida-ne’e, hosi saida mak oras ne’e ita hasoru tanba ita hotu-hotu la’o hela ho analog. Agora ita hakarak ba iha dijitál, entaun ita presiza hetan informasaun sira-ne’e no ita adapta ho situasaun reál ne’ebé mak ohin loron mundu la’o no Timor-Leste parte ida hosi mundu hakarak ka lakohi iha obrigasaun atu adapta ho situasaun reál sira-ne’e,” Ministru Asuntu Parlamentár no Komunikasaun Sosiál (MAPKOMS), Francisco da Costa Jerónimo, hateten liuhosi diskursu iha serimónia atribuisaun sertifikadu ba formandu Sentru Formasaun Teknika iha Komunikasaun (CEFTEC-sigla portugués) iha salaun Delta Nova, kinta ne’e.

Governante ne’e hato’o agradesimentu ba formadór sira tanba sakrifisiu hodi fahe matenek no forma formandu hamutuk 300-resin ne’ebé ohin finaliza formasaun.

“Agradese ba ita-boot (formadór) sira-nia sakrifisiu halo formasaun no forma ita-nia ajente hamutuk 300-resin ne’ebé ohin ne’e ita bele fahe sertifikadu ba sira, nune’e ba ita-boot sira-nia sakrifisiu ne’ebé halo. ha’u hanoin ita-boot sira mós iha lamentasaun tanba dala ruma ba to’o iha fatin sira-ne’ebé loloos la presiza ba hodi halo serbisu sira,” nia dehan.

Iha biban ne’e, nia aumenta, planu anuál MAPKOMS ba tinan 2022 atu halo estensaun formasaun ba nível munisípiu haat, maibé halo liu tiha munisípiu haat ba lima ho RAEOA. Ida-ne’e esforsu ida makaas no presiza iha duni boa vontade no responsabilidade atu halo kna’ar sira hanesan ne’e.

Iha formasaun sira-ne’e la’ós ba forma hela de’it formandu sira maibé formasaun sira-ne’e bele forma maibé sei hetan akompaña nafatin kada ema sira-ne’ebé oras ne’e tuir hela formasaun no remata ona formasaun ho sertifikadu ne’e.

“Entaun, labele kontente de’it ho sertifikadu ne’e ohin, maibé tenke hatudu ita-nia kompeténsia ita bele ka lae. Tuir tiha formasaun oras 40 no oras 80 depois mai hateten loke took pajina Ministériu nian, maibé la hatene entaun se hanesan ne’e seidauk kompetente presiza tan formasaun,” nia esplika.

Nia husu atu formandu sira bainhira finaliza ona formasaun atu kontinua estuda, nune’e labele lakon bukae ne’ebé hetan ona iha formasaun, nune’e labele haluha atu kadi nafatin kakutak ho saida mak imi hetan no apreende lee tan livru sira atu kakutak ne’e kadi hela nafatin.

Coordenadór Sentru Formasaun Teknika iha Komunikasaun (CEFTEC-sigla portugués), Rafael da Silva Freitas, hateten atividade prinsipál CEFTEC nian mak fó formasaun hodi aumenta no kapasita di’ak liután, formandu sira-nia identidade iha sosiedade hodi kontribui ba dezenvolvimentu nasionál iha setor komunikasaun sosiál, tantu públiku no mós privadu.

“Ba tinan ida-ne’e CEFTEC prodús formandu iha nível nasionál no munisipál hamutuk 323 ne’ebé kompostu hosi mane 159 no feto 164. Formandu sira-ne’e mai hosi liña ministériál ka setór públiku hosi nível nasionál no munisipál, setor privadu, sentru informasaun suku no estudantes universitáriu no sekundáriu,” nia hateten.

Formasaun iha nível nasionál, iha tinan ida ne’e CEFTEC mós realiza formasaun iha nível munisipál hanesan iha Manatuto, Baucau, Bobonaru, Lautm, Dili no RAEOA ba área formasaun Relasaun Públika no Servisu Protokolu no Múltimedia.

Aliende ne’e, CEFTEC liuhosi MAPCOMS iha parseria entre Institutu Camoes hodi implementa Projetu Consultóriu Lingua para Jornalista, ne’ebé iha tinan ne’e prodús ona formandu hamutuk 121 iha área oioin, hanesan portugés espesifiku para jornalista saúde no justisa, pensamentu krítiku, matemátika para jornalista no seluk tan.

“Entaun, nu’udar Sentru Formasaun Estadu nian, ida-ne’ebé hetan akreditasaun hosi Institutu Nasional Dezenvolvimentu Mão de Obra-INDMO, CEFTEC nafatin tau atensaun no prioridade ba nia rekézitu tomak, hodi asegura kualidade formasaun ba formandu sira hotu no sei kontribuí diretamente ba kompeténsia no abilidade profisionál formandu sira-nia hodi hatán ba ezíjénsia  servisu komunikasaun sosiál iha Timor-Leste,” nia dehan.

CEFTEC nafatin buka dalan oinsá atu kanaliza didi’ak ita-nia profísionál espesializada hirak ne’e iha seitór públiku no privadu, nune’e abilidade ne’ebé sira hetan sei útil ba iha komunidade no ba sira-nia instituisaun.

Nu’udar, Sentru Formasaun CEFTEC rekuiñese nia limitasaun no frakeza sira, nune’e nafatin konsidera parseria importante sira hotu nia sujestaun, rekomendasaun no krítika sira, tanba ne’e sai hanesan bukae ida hodi hadi’ak liután implementasaun formasaun ba tempu oin mai.

Reprezentante formandu, Doni Domingos Martins, hato’o agradese ba Ministru Asuntu Parlamentár no Komunikasaun Sosiál (MAPKOMS), Francisco da Costa Jerónimo no estrutura tomak iha sentru formasaun téknika komunikasaun tanba liuhosi sira mak formandu sira bele finaliza formasaun.

“Ami-nia agradesimentu wain tebes ba ita-bo’ot sira, liuliu ba iha Ministru Asuntu Parlamentarés Komunikasaun Sosiál no estrutura tomak iha Sentru Formasaun Téknika Komunikasaun, tanba hosi ita-bo’ot sira mak ohin loron ami hotu bele mai hamri’ik iha fatin ida-ne’e, ami bele kapasita ami-nia kuiñesimentu no abilidade ne’ebé mak di’ak. Liuhosi formasaun hirak ne’ebé mak ami simu hotu tiha ona no liuhosi polítika ida ne’ebé mak Ministru Assuntu Parlamentáres no Komunikasaun Sosiál hala’o dadaun, ohin loron maka lori ami lubun bo’ot ida mai hamri’ik iha ne’e atu hatudu ba ita-boot sira katak ami susesu duni iha formasaun hirak ne’ebé ami pasa ona ka ami hala’o ona iha fulan hirak liu-bá,” nia dehan.

Entretantu, formandu no formanda ne’ebé simu sertifika hamutuk 323 ne’e mai hosi unidade ualu (8) hanesan unidade portugés ba jornalizmu, lia-tetun ba jornalizmu, hakerek imprensa, rádiu, televizasaun, múltimedia, relasaun públika no protokolu no unidade jestaun komunikasaun no krize.

Jornalista : Nelia Fernandes

Editór      : Cancio Ximenes

iklan
iklan

Leave a Reply

iklan
error: Content is protected !!