iklan

NASIONÁL, POLÍTIKA

MAPKOMS: Governu eziste atu servi nia povu no nasaun

MAPKOMS: Governu eziste atu servi nia povu no nasaun

Ministru Asuntu Parlamentár no Komunikasaun Sosiál, Francisco Jerónimo (MAPKOMS). Imajen Tatoli/Francisco Sony

DILI, 24 novembru 2022 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco da Costa Jerónimo, hateten Governu eziste atu servi nia povu no nasaun tanba iha sistema demokrátiku povu mak soberanu.

“Governu eziste atu servi nia povu no atu servi nia nasaun. Iha sistema demokrátiku povu mak soberanu tanba povu mak hili sira-nia reprezentante atu forma Governu. Nune’e, Governu tenke presta konta nafatin ba povu,” Francisco da Costa Jerónimo hateten liuhosi diskursu iha serimónia atribuisaun sertifikadu ba formandu Sentru Formasaun Teknika iha Komunikasaun (CEFTEC-sigla portugués) 300-resin iha nível nasionál no munisípiu tinan 2022, iha salaun Delta Nova, kinta ne’e.

Sistema demokrátiku fó dalan ba liberdade imprensa katak ema seluk mós bele halo krítika ba Governu no buat hotu iha rai ida-ne’e laiha ida atu falun maibé tenke nakloke.

Tanba ne’e, formasaun ba ajente ne’ebé mak iha entidade Estadu nian tenke halo, atu nune’e sira mós halo buat ruma iha sira-nia serbisu fatin, liu-liu ko’alia kona-ba ofisiál mídia iha kada ministériu no kada Autoridade Munisipál nian, ofisiál mídia sira-ne’e tenke halo serbisu ativu no kreativu no fó informasaun didi’ak ba komunidade atu hatene saida mak lala’ok Estadu no Governu nia prestasaun serbisu ba povu ida-ne’e.

“Tanba, bainhira ita hetan tiha formasaun ne’e, ita ba atu halo kna’ar sira hanesan ne’e no ita presiza atu ko’alia buat ne’ebé loos, se iha informasaun sira-ne’ebé nakonu ho hoax ka informasaun ne’ebé laloos, ita-boot sira iha obrigasaun atu hateten loos ne’e mak ida-ne’e,” nia hateten.

Tanba ne’e, formasaun múltimedia atu bele hamosu pájina mídia nian iha kada munisípiu, atu nune’e saida mak autoridade sira halo, ofisiál mídia officer sira mós tenke públika iha ne’ebá.

Se la’e orsida ema bele hateten Prezidente Autoridade ne’e la hatene servisu maibé realidade serbisu la’o maka’as no la’o barak maibé tanba informasaun laiha, entaun ema hotu mai dehan la di’ak hotu.

Aliende ne’e, Ministériu sira mós hanesan serbisu makaas maibé ikus mai ema dehan la halo buat ida, entaun presiza komunika ba mundu no ba ema hotu, liuhosi dijitál ne’ebé iha, atu nune’e sira bele akompaña situasaun sira-ne’ebé oras ne’e la’o iha Timor-Leste.

“Ita bele halo servisu hotu-hotu, maibé tenke ho profisionál. Tanba, ohin ha’u rona liafuan balun presiza mós iha responsabilidade hosi Diretora no mós CEFTEC ne’ebé sira ko’alia responsabilidade ne’e importante loos, tanba ohin loron ita ko’alia kona-ba liberdade no tenke hasai notísia kredivel no loloos maibé labele haluha responsabilidade,” nia dehan.

Tanba ne’e, nia parte husu ba formandu sira ne’ebé oras ne’e daudaun atu simu serfifikadu bainhira fila ba halo servisu tenke fó informasaun ho responsabilidade.

Entaun, nia dehan, ba munisípiu sira-ne’ebé iha ona multimedia, tinan oin ka tinan tuir mai bele kontinua fali ba programa seluk, atu nune’e bele kompleta programa ualu (8) iha Ministériu ne’e rasik.

“Ami sei halo planu, atu nune’e planu asaun ne’e munisípiu sira hotu bele hetan oportunidade ba formasaun,” nia hateten.

Jornalista : Nelia Fernandes

Editór       : Cancio Ximenes

iklan
iklan

Leave a Reply

iklan
error: Content is protected !!