iklan

HEADLINE, MUNISÍPIU, VIQUEQUE

Prezidente INDDICA husu inan aman investe labarik sira iha edukasaun

Prezidente INDDICA husu inan aman investe labarik sira iha edukasaun

Prezidente INDDICA, Dinorah Granadeiro. Imajen Tatoli/Vitorino Lopes da Costa.

VIQUEQUE, 24 novembru 2022 (TATOLI)–Institutu Defeza ba Diretu Labarik (INDDICA, sigla portugés), kinta ne’e, komemora loron mundiál ba labarik (20 novembru) ho tema: ‘labarik hotu iha diretu hanesan atu hetan protesaun hosi família no Estadu’, iha suku Maluro, postu Viqueque Vila, munisípiu Viqueque.

Biban ne’e, Prezidente INDDICA, Dinorah Granadeiro, husu inan aman sira atu investe labarik sira iha edukasaun tanba sira mak futuru nasaun.

“Investimentu ba labarik sira la’ós de’it materiál, maibé mós edukasaun no nutrisaun atu kontribui ba dezenvolvimentu. Inan aman sira tenke investe labarik sira asesu ba edukasaun tanba oan sira maka aban bain-rua sei troka ita,” Prezidente INDDICA hateten liuhosi diskursu, iha serimónia komemorasaun loron munidiál labarik, iha sede suku Maluro.

Notísia relevante: Horta selebra loron mundiál labarik ho labarik sira iha Palásiu Prezidensiál

Kada tinan Timor-Leste sempre selebra loron mundiál ba labarik tanba hafoin restaura independénsia iha tinan 2002, iha tinan tuir mai (2003) ratifika konvensaun internasionál diretu umanu no diretu ba labarik ne’ebé konsagra iha Kontituisaun Repúblika Demokrátika Timor-Leste (RDTL) hodi garante katak labarik sira hotu iha diretu hanesan.

“Tanba ne’e, ita-nia Estadu liuhosi polítika oin-oin no programa ba labarik sira atu fó benefísiu ba labarik tanba sira maka futuru nasaun. Investivimentu hahú agora bainhira labarik sei idade 0, sé maka responsável prinsipál ba labarik sira mak inan aman, tanba sira-nia papel importante ba dezenvolvimentu labarik. Labele husu de’it ba Estadu, maibé hanesan umana tenke husu ba ita-nia an saida maka tenke halo atu fó garantia ba labarik sira hodi goja sira-nia diretu,” nia tenik.

Iha fatin hanesan, Prezidente Komisaun G ne’ebé trata asuntu Edukasau, Juventude, Kultura no Sidadania, António Verdial, konsidera infraestura edukasaun iha Timor-Leste daudaun ne’e seidauk di’ak hotu, tanba ne’e Governu presiza kontinua esforsu hodi rezolve.

“Ohin loron ita hotu haree infraestura edukasaun iha Timor laran tomak seidauk di’ak hotu, ita presiza lori tempu hodi rezolve, ita-nia Govenu mós esforsu maibé sira labele rezolve infraestura iha tempu badak nian laran. Tanba ne’e, ha’u mai hodi haree no rona preokupasaun sira kona-ba edukasaun hodi lori ba Parlamentu Nasionál,” nia hato’o.

INDDICA komemora loron mundiál ne’e ho kompetisaun pintura ba labarik, halai karon no loke biblioteka móvel ba labarik sira iha suku Maluro.

Atividade ne’e partisipa hosi Administradór munisípiu no postu, xefe suku, komunidade lokál inklui estudante sira.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!