iklan

EDUKASAUN, HEADLINE

Roman ‘osan-mean’ nabilan iha sidade Dili nia lidun

Roman ‘osan-mean’ nabilan iha sidade Dili nia lidun

Rai-nakaras. Imajen Tatoli/António Daciparu

DILI, 24 novembru 2022 (TATOLI)–Sidade Dili ho nia kmanek rasik. Iha parte loromonu hakat ain la’o ba lorosa’e, husi Praia dos Coqueiros to’o Cristo Rei, iha inur Fatucama, dadeer liu-liu iha tempu lorokraik, sempre rame ho movimentu ema-nian–feto no mane, labarik ho otas oioin hodi kasu kolen. Prátika jinástika– hasai kosar. Hemu nuu laloir nia been be fresku atu kura hamrook.

Iha zona Praia dos Coqueiros hateke ba lorosa’e, hare-hetan Estatua Cristo rei hamriik-metin nonok iha Fatucama, loke liman, hateke ba loromonu. Iha Lorosa’e, bele sasin loromatan tuun iha loromonu bainhira nakaras. Haree hetan beleza naturál lorokraik nian. Hasasin loromatan lorokraik nia furak. Deskobre mós roman osan-mean ‘lekar namkari’ iha orizonte, iha lidun sidade Dili, iha ninin kapitál timoroan sira-nian.

Husi Cristo rei ba Praia dos Coqueiros no husi Avenida de Portugal ba rai-henek mutin Cristo Rei, sente kolen bele tuur iha zona “Praça da Proclamação” nia oin eh ai-matan dukur (Samanea Saman, naran sientífiku) nia okos ka iha “Casa Europa” ho arkitetu portugeza nia oin, iha luron boot ba Bidau, Lecidere. Iha ne’e, hateke hetan illa Ataúro–munisípiu (foun) ida besik Dili iha orizonte. Iha ne’e sasin ba rai-henek mutin ne’ebé naklekar namkari hafurak tasi-ibun. Furak liután, hemu ho nuu-been.

Iha ai-hali (Fikus benjamina, naran sientífiku), alende goza anin-tasi huu malirin hamaus-laran, bele haree mós bero-oan sira be balabu hela iha tasi-klaran, buka no tiha ikan. Nune’e mós ró sira, tula pasajeiru, husi Ataúro mai Dili no husi Dili ba Ataúro–vise versa. Knananuk laloran tasi baku ba mai ho melodia, hasee rai-henek mutin loron no kalan. Tanba, laloran nunka haluha atu baku-fila ba tasi laran

La to’o iha ne’e de’it, liubá Largo Lecidere, haree hetan mós Monumentu Nossa Senhora da Conceição, hale’u ho anjo-oan sira, harii iha tinan 1954 no inaugura iha tinan 1956, tuir Livru trinlinguál, Tetun, Portugés no Inglés ho títulu, Patrimóniu Arkitektóniku Orijen Portugeza Dili (2015), iha jardin laran, hamriik-metin nu’udar ‘inan-doben’, mahein Sidade Dili, sentru urbana ba timoroan sira hotu.

Estatuta sobrevinte 12 Novembru iha Motael. Imajen Tatoli/Arkivu

Liu bá-mai, iha igreja Motael nia oin. Besik Estátua 12 Novembru (Sobrevivente Sérgio Filomeno Marques ‘Amali’ ho Levireal Bucar ‘Levi’) antes ba Ponte kais, besik jardin no dalan-ninin–luron boot liubá Pálasiu Governu, iha negosiante ambulante sira fa’an hela nuu fuan fresku–oferta husi nuu tropikál, natureza Timor-Leste, nasaun eis-kolonia portugeza no okupasaun Indonézia nian ida.

Antes liubá iha ponte kais–fatin istóriku ida, iha ne’ebé éroi timoroan sira, tuir fonte oioin, hanesan; Poeta Revolusionáriu no kompozitór inu nasionál ‘Pátria, Pátria’, Borja da Costa lakon vida (14 outubru 1946–7 dezembru 1975) inklui Saudoza Rosa Filomena Bonaparte Soares ‘Muki’ ho Isabel Lobato, espoza saudozu éroi Nicolau dos Reis Lobato–Primeiru-ministru Dahuluk Timor-Leste no mós saudozu no saudoza sira seluk, iha mós Farol  ikónu ‘amorozu’ ida no fatin furak ida bele hateke ba Cristo rei, illa Ataúro, fatin ne’ebé tuir rezultadu estudu Conservation International (2016), fó-sai hosi “The Guardian”, nu’udar “maior diversidade do mundo” no Bebonuk (Suku ida ne’ebé lokaliza iha postu administrativu Dom Aleixo, munisípiu Dili).

Iha Farol, bele goza anin liberdade no haree besik liután tasi azul nu’udar bee kristalina hakmatek, iha oseanu luan. Iha pátiu Farol nian, iha uma-oan kakuluk modelu prisma triangulár ho kadeira kór laranja, tuur haree laloran tasi baku ba-mai, nakfera iha fatuk-lolon, namkari. Furak.

Anin liberdade ne’ebé oferese oksijénio (O2), lori sentidu ketak ho beleza enkantadora (keindahan mempesona) natureza no tasi azul be hale’u iha illa Timór, iha lidun sidade Dili (kapitál), entre sidade seluk iha territóriu laran – husi norte ba sul, husi leste ba oeste (Husi Jaco to’o Oe-cusse-Ambeno, husi Betano to’o illa Ataúro), ba-mai.

Bainhira prátika jinástika: la’o no halai, bee turuk morna habokon isin-lolon-kosar no hamrook, bele ‘kura’ ho nuu-been malirin be fa’an besik dalan ninin ho folin $1 hosi negosiante ambulante sira.

“Di’ak. (Nuu-been). Gostu,” Naoya, joven-vizitante ida husi Japaun hateten ba Tatoli, iha Largo Lecidere, Dili, foin lalais ne’e, bainhira hemu hela nuu-been.

Nune’e mós japonés ida tan, Sasuke hateten bainhira hemu nuu laloir ia been katak: “Ambiente moos, labele soe-fo’er arbiru”.

Istória Cristo rei no Farol

Cristo rei

Estatua Cristo rei hamriik iha laletek Fatucama, Dili, Timor-Leste. Harii iha tempu okupasaun Indonézia (1996) ho nia altura metru 27. Cristo rei hamriik besik tasi-ibun ho rai-henek mutin furak ho beleza naturál ida kmanek.

Estatua Cristo Rei, Dili. Imajen/Kobe Dallas
Estatua Cristo Rei, Dili. Imajen/Kobe Dallas

Atu la’o to’o leten, hakat liuhusi eskada. Iha eskada sira ne’e, iha mós estasaun 14, reprezenta dalan terus Jesus ba to’o foho Calvario nia tutun (iha fiar Katólika). Iha estatua Cristo rei nia ain-hun, bele haree sidade Dili nia furak iha dadeer, meudia ka iha kalan.

Iha parte lorosa’e, dadersan bele asiste loromatan ‘nakfera’ ho nia roman mihis leno sidade Dili. Goza mós anin-maus dadersan no haree laloran-tasi baku mai iha tasi-ibun. Nune’e mós manu Gaivota semo ba mai hafurak dadersan. Reprezenta panorama típika natureza (rai-illas) Timór nian.

Estatua Cristo Rei nu’udar ikonu turístiku relijiozu ida iha Dili, kapitál Timor-Leste nian. Harii iha bola mundu (globu) nia leten, obra eskultór Indonéziu, Mochamad Syailillah “Bolil’, musulmanu ida–‘interresante’, nu’udar símbolu Provínsia 27 Indonézia nian, iha dekáde rua resin liubá.

Obra ikóniku ida husi Sidade Dili ne’e, nu’udar eransa Prezidente Suharto (matebian) iha Timor-Leste. Estatua Cristo rei ne’e, tuir kronolojia balun, hetan bensaun husi Mgr. Carlos Filipe Ximenes Belo, SDB, Bispu timoroan, husi kongresaun Salezianu, bainhira konstrui ona husi Pt. Garuda Indonézia, iha tinan 26 liubá.

Farol

Farol Portu Dili, rezultadu liman-rohan portugés nian, hamriik besik tasi-ibun iha parte oeste Dili nian. Lokaliza besik estrada-ibun, nune’e fasil asesu, hodi haree laloran-tasi nia furak ho besik liután. Nune’e mós, asesu transporte públiku, Mikrolete 09 kór azul, inklui taksi sira enfeita ho kór kinur, bainhira presiza. La to’o iha ne’e de’it, dalabalun, bele asiste mós transporte marítima: Berlin-Nakroma, no seluktan.

Parseiru governu – KOICA, liuhusi kompania Caltech finaliza ona rehabilitasaun ba Farol (Lighthouse) iha arredór Farol, Dili, kuarta (09/11/2022). Imajen Tatoli/António Daciparu

Tuir Boavida, Isabel (2015), iha nia obra Património de influência portuguesa katak Farol ne’e harii uluk ho nia aas metru 7 (23 ft). Data ba hamosu Farol ne’e la klaru. Maibé, Farol ne’ebé ohin loron hamriik ‘kmanek’ ne’e, nia obra hahú iha tinan 1860 no funsiona iha 1889, husi Jenerál Rafael Jacomé Lopes de Andrade, Governadór portugés iha Dili, iha tinan 1889-1890.

Farol ne’e torre oktogonál (iha jeométria, oktogonu ne’e polígonu ho ninin ualu) ho estrutura besi (ferro), pinta ho kór mutin hafurak ho azul, matak no kór-laranja sikat-leet, sai mós sentru ba husik tempu livre, iha dadeer, meiu dia ka lorokraik, husi loron ba loron. Loron ba loron, roman “osan-mean” hirak ne’e mak nabilan iha sidade Dili ni lidun, ho lidun ida-ne’ebe nunka maran hosi naroman, nafatin ba nafatin.

Jornalista : Rafy Belo

Editór        : Cancio Ximenes

iklan
iklan

Leave a Reply

iklan
error: Content is protected !!