iklan

EKONOMIA, BOBONARO, HEADLINE, INKLUZAUN SOSIÁL, MUNISÍPIU

SEA prepara brigada ambientál 50 iha Bobonaro atu proteje ambiente

SEA prepara brigada ambientál 50 iha Bobonaro atu proteje ambiente

Joven sira iha munisípiu Bobonaro partisipa formasaun hosi Sekretaria Estadu Ambiente atu envolve iha Movimentu Brigada Ambientál. Imajen Tatoli/Sérgio da Cruz.

BOBONARO, 24 novembru 2022 (TATOLI) – Sekretaria Estadu Ambiente (SEA) liuhosi Sentru Edukasaun Informasaun Ambientál (CEIA, sigla portugés), kinta ne’e realiza formasau hodi  hahú prepara joven 50 iha munisípiu Bobonaro atu envolve iha Movimentu Brigada Ambientál nune’e konserva no proteje ambiente.

Diretora CIEA hosi SEA, Amenica Machado Fernandes, esplika, atu rezolve problema ambiente Governu mesak de’it labele, tanba envolvimentu juventude iha asaun protesaun ambiente sei menus tebes.

Tuir nia, atu responde ba asuntu ne’e presiza asaun integradu, planu sistemátika, oinsá bele envolve jerasaun foun sira-ne’ebé sai nu’udar ajente transformadór nune’e bele hola parte iha asaun konservasaun.

Notísia relevante: SEA bolu atensaun negosiante hapara atividade fa’an plástiku kresek

Tanba ne’e SEA serbisu hamutuk ho parseiru dezenvolvimentu UNDP no ajénsia internasionál sira realiza formasaun refere ho objetivu atu partilla formasaun ba joven sira kona-bá asuntu kuidadu ambientál.

“Formasaun ida-ne’e atu prepara ita-boot sira, atu envolve iha Movimentu Brigada Ambientál, hodi nune’e ita-bot sira bele halo planu no atividade rasik, oinsá atu konserva no proteje ambiente iha munisípiu Bobonaro,” nia hateten iha intervensaun bainhira realiza iha Salaun Cruz Vermelha Timor-Leste, munisípiu Bobonaro.

Diretora ne’e hatutan, informasaun sira-ne’ebé partilla iha atividade durante loron tolu ne’e hanesan bukae ida ba joven sira-ne’ebé ho asaun voluntarizmu hakarak envolve iha movimentu Brigada Ambientál.

“Depois iha loron ikus ami sei intrega ID Card ba ita-boot sira, nu’udar identidade hodi ita-boot sira utiliza símbolu ida-ne’e atubele halo asaun defeza ho voluntarizmu ba iha ambiente, kapasita ita-boot sira-nia aan hodi nune’e bele hasa’e kualidade ambiente  iha munisípiu Bobonaro,” nia akresenta.

Diretór Nasionál Biodiversidade-SEA, Rui dos Reis Pires, reforsa asaun sira-ne’e ho objetivu atu garante dezenvolvimentu sustentável ba Timor-Leste nune’e jerasaun foun sira bele sente moris iha ambiente mós no hakmatek.

“Ita halibur malu iha fatin ida-ne’e la’ós atu ko’alia de’it, maibé aban bainrua sei halo asaun konkreta, liuliu ba alin brigsita sira, Bobonaro atu di’ak ka la di’ak, nu’udar Timoroan responsabilidade iha ita hotu nia liman,” nia hateten.

Reprezentante Presidente Autoridade Munisípiu Munisipiu, Mário Barreto, agradese ba SEA tanba kria ona polítika ne’ebé envolve joven sira iha asaun konservasaun ambiente.

“Ha’u husu ba joven sira atu aproveita oportunidade ne’e ho di’ak, atu nune’e bele apár atividade konservasaun ambiente nian ba komunidade,” nia katak.

Tuir dadus hosi SEA katak, totál brigadista ambientál iha nasionál hamutuk na’in-450 no daudaun ne’e halo tán espansaun ba munisípiu 13 no kada munisipiu ema na’in-50.

Notísia relevante: Ezisténsia SEA iha munisípiu atu asegura ambiente saudável

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!