iklan

HEADLINE, MUNISÍPIU, VIQUEQUE

CAC identifika empreza manipula kuantidade produtu Cesta Bázika iha Caraubalo Viqueque

CAC identifika empreza manipula kuantidade produtu Cesta Bázika iha Caraubalo Viqueque

Produtu Cesta Bázika ne’ebé empreza sira fahe ba nebefisiáriu iha suku Caubalo, Viqueque, sesta (25/11). Imajen Ttaoli/Vitorino Lopes da Costa

VIQUEQUE, 25 novembru 2022 (TATOLI)—Komisaun Antí-Korrupsaun (CAC, sigla portugés) halo inspesaun ba distribuisaun produtu Cesta Bázika iha suku Caraubalo, postu administrativu Viqueque Vila, munisípiu Viqueque, ne’ebé identifika empreza manipula kuantidade produtu.

“Empreza distribui iha aldeia haat, suku Caraubalo, agora aldeia rua mak kontinua halo distribuisaun. Iha prosesu distribuisaun empreza halimar kuantidade mina, iha kuotasaun tuir loos mina litru 5 no kafé grama 800, maibé iha prosesu distribuisaun mina iha de’it litru 4,50, kuantidade seluk lakon ba ne’ebé? Tuir regra hosi Sekretaria Estadu Kooperativa (SEKoop) bainhira iha mudansa tenke konfirma ba autoridade hodi halo deklarasaun ruma, maibé buat ida laiha. Entaun tanba mosu preokupasaun maka ami informa ba CAC hodi halo identifikasaun ba produtu Cesta Bázika,” Xefe suku Caraubalo, João Pinto, informa ba Agência Tatoli, iha suku Caraubalo, sesta ne’e.

Nia dehan, bainhira empreza atu kontinua distribui, tenke aumenta kuantidade sasán tuir kuotasaun hosi ministériu implementadór sira.

“Ha’u husu Governu tenke hamenus empreza sira-nia osan, bainhira sira nafatin manipula kuantidade sasán no halimar folin ba produtu Cesta Bázika,” nia akresenta.

Notísia relevante: Governu lansa distribuisaun cesta bázika faze daruak iha suku Luka Viqueque

Aleinde ne’e, Autoridade lokál ne’e lamenta tanba bainhira empreza sira halo distribuisaun, laiha liña koordenasaun ho autoridade lokál sira, to’o ikus maka autoridade sira hetan irregularidade iha terrenu.

“Ita hatene katak sidadaun ida iha diretu sasán Cesta Bázika ho valór $50, maibé povu simu la to’o $50, ida-ne’e osan hira maka lakon. Tanba ne’e ami agradese ba CAC ne’ebé halo ona intervemsaun ba distribuisaun sasán,” nia tenik.

Nune’e, durante intervensaun, CAC sujere ba Xefe suku Caraubalo hodi halo koordenasaun ho SEKoop no empreza distribuidór hodi konfirma produtu sira tenke bazeia ba kuotasaun.

“CAC sujere ba ha’u hodi halo koordenasaun SEKoop no empreza atu haree presu produtu sira ne’ebé la to’o tenke kompleta hikas produtu sira. Prosesu distribuisaun iha suku Caraubalo la’o di’ak, maibé empreza distribuisaun maka halimar presu pakote Cesta Bázika,” nia tenik.

Tipu produtu ein pakotementu ne’ebé distribui iha suku Caraubalo mak hanesan foos kilograma 5, fehuk ropa lokál kilograma 1, na’an-karau isin kilograma 1, ikan maran grama 500, manutolun 5, koto grama 500, fore-mungu kilograma 1, lis-mean no lis-mutin grama 500, masin timor ida, mina-sona , kafé Timor, sabaun 3, deterjente kilograma 1, inklui masin-midar.

Suku Caraubalo kompostu hosu aldeia hitu, ho totál benefisiáriu 6.704, ne’ebé hosi númeru ne’e benifisiáriu iha aldeia haat mak simu ona Cesta Bázika hamutuk 5.565.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!