iklan

NASIONÁL, EKONOMIA, DILI, HEADLINE

Dadus la kompletu, komunidade Metiaut hapara distribuisaun cesta bázika

Dadus la kompletu, komunidade Metiaut hapara distribuisaun cesta bázika

DILI, 26 novembru 2022 (TATOLI)- Komunidade suku Metiaut, postu administrativu Cristo Rei, munisípiu Dili, hapara distribuisaun Cesta Bázika, tanba komunidade balun naran laiha lista.

 Xefe Suku Metiaut, Mateus Inácio da Costa, informa Ministériu Turismu Komérsiu no Indústria (MTCI, sigla portugés) ho Empreza The New Brother Hood, Unipessoál Lda atu halo distribuisaun cesta bázika ba suku metiaut, maibé dadus la kompletu.

“Dadus ne’ebé ami haruka ba Estatál, liuhosi ami-nia diresaun postu administrativu Cristo Rei ba munisípiu Dili entrega fali ba Estatál mak dadus ne’e mai la refleta ho ami-nia dadus, entaun ida-ne’e komplikadu oituan. Tanba, ita-nia komunidade sira ho razaun katak iha tinan kotuk kuandu halo reklamasaun, maibé rezultadu ne’e la mai, entaun ho esperiensia sira ne’e maka ita-nia komunidade hateten di’ak liu rezolve dadus halo loos, maka mai ami prontu simu cesta bázika,” Mateus Inácio da Costa, informa ba Tatoli iha nia knaar fatin, Díli, sábadu ne’e.

Nia katak, komunidade sira lamenta dadus hosi aldeia 17 abríl ne’ebé haruka ba nasionál, xefe família 219 no abitante hamutuk 1.083. Maibé, dadus ne’ebé Governu, liuhosi MTCI lori mai, xefe família hamutuk 163 no abitante hamutuk 386.

“Parte MTCI mai esplika mós mai ami katak, sira-ne’ebé naran iha simu lai depois ita halo reklamasaun, maibé problema mosu to’o ohin loron la konsege halo distribuisaun tanba família sira ne’ebé uluk naran ita hatama, ida no na’in-rua mak naran la iha ne’e oinsá seluk no ita konsidera halo reklamasaun, maibé piór liu mak naran sira-ne’ebé uluk simu ona, hanesan ha’u uluk simu ona, maibé agora ha’u-nia naran laiha, tanba ne’e maioria sira ohin ko’alia barak lakohi simu, tanba de’it sira uluk simu, maibé agora naran laiha,” nia esplika.

Ho preokupasaun komunidade, Autoridade Lokál ne’e hateten, Ministériu Administrasaun Estatál pelemenus mai hamutuk ho Ministériu Turismu Komérsiu no Indústria (MTCI, sigla portuugés), hanesan implementadór bele esplika ba komunidade, naran laiha tanba saláriu boot ka, dadus mak salah no salah iha parte ne’ebé.

“Tanba, MTCI hateten, dadus ne’e ami simu hosi Estatál, maibé kria problema mai ami maka, se naran sira uluk simu ona mak mai nafatin no membru ida no rua mak laiha, ita bele tolera maibé piór liu mak naran sira tuan iha no uluk simu ona, maibé agora naran laiha,” nia dehan.

Asesór Politika iha Ministériu Turismu Komérsiu no Indústria (MTCI, sigla portugés), Basilio Soares Marques, hateten komunidade sira preokupa kona-ba dadus distribuisaun cesta bázika iha suku Metiaut ne’e loos.

“Los duni, entre MTCI ha’u rasik mak hanesan ekipa koordenasaun ho Autoridade suku sira ami iha konsensu ida hamutuk ho Autoridade Lokál ho porta voz komunidade sira katak, dadus ida ne’ebé laloos Ministériu sei ba rezolve ho Ministériu Administrasaun Estatál koopera hamutuk ho xefe suku no xefe aldeia suku metiaut, depois rezolve hotu Ministériu Administrasaun Estatál kuandu hatun fali dadus ne’ebé loos hodi entrega mai MTCI, hafoin ami kontaktu ho Autoridade Lokál Metiaut nian hodi mai fila fali fahe,” nia dehan.

Tuir nia, dadus ne’ebé MCTI simu hosi Ministériu Administrasaun Estatál (MAE, sigla portugés), hamutuk 386 lista aprovadu benefisiáriu ne’ebé atu simu cesta bázika.

Jerente Empreza The New Brother Hood, Unipessoál LDA, Júlio Correia de Araújo, hateten iha sesta ne’e nia empreza atu halo distribuisaun cesta bázika ba suku Metiaut, maibé tanba dadus la kompletu komunidade sira la satisfas no komunidade husu atu MTCI ba rezolve hafoin bele mai halo distribuisaun.

“Distribuisaun la la’o la’os tanba produtu, maibé lista benefisiáriu. Tanba lista benefisiáriu iha ami-nia kontratu ho MTCI simu hosi estatál menus liu fali benefisiáriu lolos ne’ebé atu simu cesta bázika, entaun komunidade la satifas ho ida ne’e no sira hakarak rezolve hotu lai, hafoin bele distribui,” nia katak.

Nia dehan, iha prosesu kontratu empreza ne’e atu distribui cesta bázika ba komunidade iha suku metiaut hamutuk 386 cabeças, maibé realidade komunidade iha suku metiaut besik mill.

“Entaun, ho akontesimentu ne’e ami kompañia ladún satifas, tanba problema ne’e ami rezolve ona no loloos, ami fahe dahuluk iha suku ne’e, maibé tanba aldeia ne’e problema entaun ami fahe de’it ba aldeia rua (2), hosi ne’e ami ba fahe fali iha suku Bidau Santana loron haat (4) nia laran, problema la rezolve nafatin no iha kinta ne’e ami sei ba husu nafatin sira hateten ba fó tuir de’it kontratu, maibé realidade ami mai mosu dezentendimentu ami sai vítima, tanba ami nia naan karau oho tiha rua (2), ida ne’e fó risku mai ami tanba na’an folin boot, tanba ne’e ami husu ba Governu bele rezolve ida ne’e,” nia esplika.

Tir dadús ne’ebé  Tatoli asesu hosi Xefe Suku Metiat katak, xefe família hamutuk 445, ho abitante hamutuk 2171, kompostu hosi aldeia tolu (3), hanesan aldeia Fatukama, Karungulau no aldeia 17 Abril mak submete ba nasionál atu simu cesta bázika.

Jornalista : Nelia Fernandes
Editór : Evaristo Soares Martins

iklan
iklan

Leave a Reply

iklan
error: Content is protected !!